Dünya reytinqi: “Bavariya”, “Real” və “Barselona”...

Beynəlxalq Futbol Tarixi və Statistikaları Federasiyası (İFFHS) dünyanın ən güclü klublarının növbəti reytinq cədvəlini açıqlayıb. Futbolxeber.az-ın məlumatına görə, sıralamaya əvvəlki kimi “Bavariya” başçılıq edir. Münhen klubunun ən yaxın izləyicisi - Madrid “Real”ının da mövqeyi dəyişilməz olaraq qalıb. Ötən ayla müqayisədə 2 pillə irəliləyən “Barselona” ilk “üçlüy”ü qapayır.

1 pillə geriləyən “Çelsi” sıralamada dördüncü, “Atletiko” isə beşincidir. İlk “onluq”da həmçinin “Atletiko Mineyro” (Braziliya), “Bazel” (İsveçrə), “İndependiente” (Kolumbiya), “Fiorentina” (İtaliya) və “Borussiya” (Dortmund, Almaniya) qərarlaşıblar.

Avropanın aparıcı klublarından “Tottenhem” 11-ci, PSJ 12-ci, “Arsenal” 13-cü, “Napoli” 15-ci, “Yuventus” 17-ci, “Mançester Siti” 18-ci, “Latsio” 30-cu, “Milan” 40-cı, “Mançester Yunayted” 46-cı, “Roma” 65-ci, “Liverpul” 139-cu, “Monako” isə 192-cidir.  

Millimizin üzvü Ruslan Abışovun çıxış etdiyi “Rubin”, ötən ayla müqayisədə 6 pillə geriləyib. Kazan klubu hazırda sıralamada 16-cıdır.

Türkiyə klublarından ən yaxşı nəticə “Trabzonspor”a məxsusdur. “Bordo-mavililər” 31-ci pillədə qərarlaşıb. “Qalatasaray” 56-cı, “Fənərbaxça” isə 59-cudur.