“Bakı-Xankəndi”: ikinci mərhələ başa çatdı, Fyodorov qalib oldu

Bu gün "Bakı-Xankəndi" Azərbaycan velosiped yarışının ikinci mərhələsi keçirilib.

Futbolxeber.az saytının məlumatına görə, ikinci etap 193,2 kilometr məsafəni əhatə edir.

Bakıda start götürəcək tur İsmayıllıda yekunlaşıb.

Budəfəki mərhələnin qalibi Yevgeni Fedorov olub. Qazaxıstanın “XDS Astana Team” komandasının üzvü gərgin mübarizədə finişi birinci keçib. O, məsafəni 4 saat 41 dəqiqə 38 saniyəyə qət edib. İsveçrəli Aleksandr Balmer ikinci, uruqvaylı Erik Antonio Faqundez üçüncü olub.

Mərhələ başa çatdıqdan sonra qaliblərin mükafatlandırılması mərasimi keçirilib. Tədbirdə İsmayıllı Rayon İcra Hakimiyyətinin başçısı Nahid Bağırov, Azərbaycan Velosiped İdmanı Federasiyasının 1-ci vitse-prezidenti, "Bakı-Xankəndi" Azərbaycan Velosiped Yarışının Təşkilat Komitəsinin sədri Sahib Ələkbərov iştirak ediblər.

Yarışın məqsədi ölkədə velosiped idmanının inkişafına töhfə vermək, Azərbaycanın beynəlxalq idman tədbirlərinə uğurla ev sahibliyi etdiyini bir daha nümayiş etdirmək və işğaldan azad olunmuş ərazilərə diqqəti artırmaqdır.

Beynəlxalq Velosipedçilər İttifaqının (UCI) 2.1 kateqoriyalı yarışında dünyanın 20 ölkəsini təmsil edən 24 komanda mübarizə aparır. Beş mərhələdən ibarət olan yarışın mükafat fondu 50 000 avrodan çoxdur. Yarışa mayın 14-də yekun vurulacaq.

Turnirin son mərhələsi isə Xankəndi şəhərində baş tutacaq.