Bakı-Xankəndi velosiped yarışının mükafat fondu 50 min avrodan çoxdur

Bakı-Xankəndi Velosiped Yarışının mükafat fondu 50 min avrodan çoxdur.

Futbolxeber.az saytının məlumatına görə, bu barədə Azərbaycan Velosiped İdmanı Federasiyasının 1-ci vitse-prezidenti, Bakı-Xankəndi Azərbaycan Velosiped Yarışının Təşkilat Komitəsinin sədri Sahib Ələkbərov mətbuat konfransında bildirib.

Qurum rəsmisi yarışın mükafat fondu ilə bağlı danışıb:

"Yarışın mükafat fondu 50 min avrodan çoxdur. Bu mükafat qaliblər arasında bölünəcək. Həm sprint həm də dağ velosipedlərin yarışında hər mərhələnin qalibi mükafatlandırılacaq".

Qeyd edək ki, mayın 10-da start götürəcək Bakı-Xankəndi Azərbaycan Velosiped Yarışında dünyanın 20 ölkəsini təmsil edən 24 komanda iştirak edəcək. 5 gün davam edəcək yarışın əsas məqsədi Azərbaycanda velosiped idmanının inkişafına töhfə vermək, ölkəmizin beynəlxalq idman arenalarında nüfuzunu daha da artırmaq və regionun idman turizmi potensialını tanıtmaqdır.