Mahir Məmmədov: “Vüqar Həşimov Memorialı dünya şahmatına böyük töhfədir”

Azərbaycan Şahmat Federasiyasının prezidenti Mahir Məmmədov dekabrın 9-da start götürəcək XI Vüqar Həşimov Memorialı ilə bağlı danışıb.

Futbolxeber.az saytının məlumatına görə, turnirin mətbuat xidmətinə açıqlama verən federasiya rəsmisi yarışın davamlı keçirilməsinin sevindirici hal olduğunu söyləyib.

Onun sözlərinə görə, bu turnir Vüqar Həşimov Şahmat Fondu, Azərbaycan Şahmat Federasiyası və əlaqədar təşkilatların birgə səyinin nəticəsidir: “Tədbirin mütəmadi olaraq keçirilməsi Vüqar Həşimov şəxsiyyətinin miqyasını göstərir. Bu həm də dünya şahmatçıları tərəfindən Vüqarın adının yüksək tutulması ilə əlaqədardır. Sadaladığım amillər memorialın uzun illər keçiriləcəyinə əsas verir. İlk illərdə yarış Şəmkir, Bakı və Qəbələ şəhərlərində keçirildi. Son illərdə isə işğaldan azad edilmiş ərazilərdə baş tutur. Memorialın Şuşa və Xankəndidə təşkil olunması gözəl ənənədir və bunu davam etdirəcəyik. Turnirin gələcəkdə müxtəlif ünvanlarda keçirilməsi də istisna edilmir. Bu isə Azərbaycanın digər bölgələrinin tanıdılması üçün gözəl vasitədir. Azərbaycanın şahmat ənənələrini, gücünü nəzərə alsaq, turnir dünya şahmatına olan böyük töhfədir”.

Federasiya rəhbəri Memorialın FIDE dünya çempionatının seçmə mərhələsinə daxil edilməsi ilə bağlı da fikirlərini bildirib: “Vüqar Həşimovun xatirə turniri ilk günlərdən ən yüksək səviyyədə təşkil olunub. Bu səbəbdən turnirin FIDE tərəfindən seçmə mərhələnin tərkib hissəsi kimi qəbul olunması əbəs deyil. İnanırıq ki, bu belə də olacaq və gələcəkdə daha yüksək səviyyələrə qalxacaq”.

M.Məmmədov mərhum Avropa çempionu ilə bağlı düşüncələrini də bölüşüb: “Vüqar Həşimov Azərbaycanın şahmat tarixində çox parlaq, unudulmaz iz qoyub. İlk addımlarından son günlərinədək gözümüzün qabağında idi. Dünyanın ən görkəmli, aparıcı şahmatçılarından birinə çevrilməsinin, qələbələrinin şahidi olduq. Adı “Ginnesin rekordlar kitabı”na salınan Faiq Həsənovun 85 illiyinə həsr olunmuş filmdə Vüqar Həşimov haqqında maraqlı kadrlar da geniş tamaşaçı kütləsinə çatdırılıb. Fəxr hissi ilə deyə bilərəm ki, Vüqar şahmat nəzəriyyəsinə də böyük töhfələri ilə yadda qalıb. Bu sözü çox az şahmatçı haqqında demək olar. Sevinirik ki, bu ad, bu xatirə daim yaşayır. Bu, təkcə memorial turniri deyil. Bu turnirin gələcəkdə “Baku Chess Tour”a əlavə olunması istisna edilmir. Vüqarın xatirəsi daim yaşayacaq”.