Azərbaycan cüdoçuları Perudakı Qran-Prini 7 medalla başa vurublar

Perunun paytaxtı Limada cüdo üzrə Qran-Pri turniri başa çatıb.

Futbolxeber.az saytının məlumatına görə, son yarış günündə Azərbaycanın daha 2 cüdoçusu fəxri kürsüdə yer alıb.

90 kiloqram çəki dərəcəsində tatamiyə çıxan Murad Fətiyev beş aylıq fasilədən sonra qayıdışını gümüş medalla qeyd edib. Ən ağırların mübarizəsində isə Kənan Nəsibov (+100 kiloqram) bürünc medala sahib çıxıb. Bu, 21 yaşlı cüdoçumuzun Dünya Turu Seriyasında qazandığı ilk medal kimi əlamətdar olub.

Beləliklə, milli komanda beynəlxalq turniri 7 medalla tamamlayıb. Daha əvvəl Əhməd Yusifov (60 kiloqram) gümüş, Rəşad Yelkiyev, Ruslan Paşayev (hər ikisi 66 kiloqram), Ömər Rəcəbli (81 kiloqram) və Könül Əliyeva (48 kiloqram) bürünc mükafat qazanıblar.