Ulu öndərin anadan olmasının 102-ci ildönümünə həsr olunmuş "Turan Kuboku"na yekun vurulub

Gənclər və İdman Nazirliyinin, Milli Olimpiya Komitəsinin, Bakı şəhər Gənclər və İdman İdarəsinin, Milli İdman Növləri Assosiasiyasının, Beynəlxalq və Avropa Kəndirlə Mübarizə Federasiyasının dəstəyi, həmçinin Azərbaycan Kəndirlə Mübarizə İdmanı Cəmiyyəti İctimai Birliyinin təşkilatçılığı ilə Ümummilli lider Heydər Əliyevin anadan olmasının 102-ci ildönümünə həsr olunmuş kəndirlə mübarizə idman növü üzrə 1-ci "Turan Kuboku" turniri başa çatıb.

Futbolxeber.az saytının məlumatına görə, yarışdan əvvəl Beynəlxalq Kəndirlə Mübarizə Federasiyasının birinci vitse-prezidenti Pete Dyer və Avropa Kəndirlə Mübarizə Federasiyasının prezidenti Ralf Braununqer, Milli İdman Növləri Assosiasiyasının prezidenti Kazım Qurbanov, Avropa Kəndirlə Mübarizə Federasiyasının birinci vitse-prezidenti və Azərbaycan Kəndirlə Mübarizə İdmanı Cəmiyyəti İctimai Birliyinin prezidenti Elnur Şıxəliyev turnirin əhəmiyyətindən söz açıblar.

Elnur Şıxəliyev "Turan Kuboku" turniri layihəsinin hər il türkdilli ölkələrdən birində keçiriləcəyini bildirib və növbəti il üçün xüsusi hazırlanmış simvolik açarı Türkiyə Kəndirlə Mübarizə Federasiyasının prezidenti Eray Aldəmirə təqdim edib. O, həmçinin turnir üçün hazırlanmış xalçaları qonaqlara hədiyyə edib.

Yarışda 23 yaşa qədər oğlanların mübarizəsində Azərbaycan 1-ci, Türkiyə 2-ci, Pakistan 3-cü olub. 23 yaşa qədər qarışıq (mixed) kateqoriyada Qazaxıstan 1-ci, Azərbaycan 2-ci, Türkiyə 3-cü yerə layiq görülüb. Kişilərin mübarizəsində Qazaxıstan 1-ci, Pakistan 2-ci, Azərbaycan 3-cü yeri tutub. Böyüklərdə qarışıq (mixed) kateqoriyanın qalibi Qazaxıstan, 2-ci yerin sahibi Azərbaycan və 3-cü yerin sahibi İran komandası olub.

Fərqlənən komandalara Bakı şəhər Gənclər və İdman İdarəsi tərəfindən diplomlar, Azərbaycan Kəndirlə Mübarizə İdmanı Cəmiyyəti İctimai Birliyi tərəfindən yarış üçün xüsusi hazırlanmış medal və kuboklar təqdim olunub.

Qeyd edək ki, turnirdə Azərbaycan, Türkiyə, Qazaxıstan, Türkmənistan, Pakistan, Hindistan, İran, Gürcüstan, Səudiyyə Ərəbistanı, Sudan və Cənubi Afrika Respublikası komandaları iştirak ediblər.