Cüdoçumuzdan çempionluq şərhi

Paris-2024-də Azərbaycana ikinci qızıl medalı qazandıran cüdoçu Zelim Kotsoyev çempionluğunu şərh edib.

Futbolxeber.az saytının məlumatına görə, İTV-nin canlı yayımında Z.Kotsoyev ilk növbədə Azərbaycan xalqını təbrik edib: “Bilirəm ki, çoxları mənə dəstəkləyirdi, azarkeşlik edirdi. Bu qələbə komanda yoldaşlarım, ailəm, dostlarım üçündür. Biz yalnız özümüz üçün yarışsaydıq, bu qədər motivasiyamız olmazdı. Bilmirəm nə deyim. Sən bütün həyatın boyu ona doğru gedirsən və ... indi bilmirəm bunu necə şərh edim. Çox şadam”.

İdmançımız Parisdə daha əvvəl qızıl medal qazanan komanda yoldaşı Hidayət Heydərovun ona çox dəstək olduğunu söyləyib: “Hidayətlə bizim çox yaxşı əlaqəmiz var. Birlikdə məşq edirik, birlikdə istiahət edirik. 2 gün əvvəl o, çempion olanda çox sevinirdim. Hidayətin çempionluğu mənim üçün ikiqat motivasiya oldu. Dünən gecə yatmamışdan öncə mesaj yazdı, dedi ki, heç nə düşünmə, sadəcə tatamiyə çıx və bacardığını et. Uğurumda şəxsi məşqçim Elxan Məmmədovun, eləcə də millinin baş məşqçisinin də böyük rolu var. Federasiya rəhbərliyi bizə hər cür dəstək olur. Mən idmançılarla bu cür ünsiyyət quran, onlara dəstək olan federasiya prezidenti görməmişəm. Böyük komandamız var. Necə işlədiksə, elə də nəticə qazandıq”.

Cüdoçumuz sonda “Bu çempionluğu kimə həsr edirsən?” sualını belə cavablandırıb: “Azərbaycana və məni dəstəkləyənlərə. Onları sevindirə bildiyim üçün çox şadam. Hidayət çempion olduqdan sonra cənab Prezident ona zəng vurdu, təbrik etdi. Bu, mənim üçün əlavə motivasiya idi. Çox şadam ki, mən də çempion olmağı bacardım. 2015-ci ildən Azərbaycanda yaşayıram, çıxış edirəm”.