“Xarıbülbül”ün oyunu təxirə salınıb

Kişilərdən ibarət “Xarıbülbül” voleybol klubu Azərbaycan Voleybol Federasiyasına (AVF) müraciət ünvanlayıb.

Futbolxeber.az saytının məlumatına görə, müraciət bu gün Yüksək Liqada keçirilməsi nəzərdə tutulan oyunun təxirə salınması ilə bağlıdır.

Sənəddə bildirilir ki, “Xarıbülbül” klubu Çelenc Kubokunun 1/16 final mərhələsində noyabrın 29-da Yunanıstanın “Panatinaikos" kollektivinə qarşı cavab matçına çıxacaq. Şuşa təmsilçisinin bu oyuna səmərəli hazırlaşa bilməsi üçün noyabrın 23-də Azərbaycan çempionatında “Xarı Bülbül"ə (Laçın) qarşı matçının təxirə salınması xahiş olunub.

AVF bu müraciəti nəzərə alaraq, noyabrın 23-nə planlaşdırılan “Xarıbülbül” (Şuşa) - “Xarıbülbül" (Laçın) görüşünün təxirə salınması ilə bağlı qərar qəbul edib.

Beləliklə, bu gün Yüksək Liqada yalnız bir qarşılaşma baş tutacaq. Saat 19:00-da “Azərreyl” - “Murov Az Terminal” komandaları üz-üzə gələcəklər.

Qeyd edək ki, təxirə salınan “Xarıbülbül" (Şuşa) - “Xarıbülbül" (Laçın) matçının keçiriləcəyi tarix haqqında məlumat veriləcək.