Hacı Əliyev: "Bu yarışda qalib ölkənin idmançıları kimi çıxış edəcəyik"

"Hərbçilər arasında ölkəmizdə keçiriləcək dünya çempionatı biz idmançılar üçün gözəl fürsətdir".

Futbolxeber.az saytının məlumatına görə, bu sözləri jurnalistlərə açıqlamasında Azərbaycanın sərbəst güləş millisinin lideri, üçqat dünya çempionu Hacı Əliyev deyib.

O, noyabrın sonunda Bakıda təşkil olunacaq hərbçilər arasında güləş üzrə 36-cı dünya çempionatında uğurlu çıxış edəcəklərinə inandığını söyləyib: "Hərbçilərin dünya çempionatına hazırlaşırıq. Təlim məşqlərimiz başlayıb. Sərbəst güləş millimizin bəzi üzvlərini çıxmaq şərti ilə, tam heyətlə yarışda iştirak edəcəyik. Bilirsiz ki, aprel ayında olimpiya oyunlarına lisenziya xarakterli turnir keçiriləcək. Mənə elə gəlir ki, bu yarış da hazırlıq baxımından fürsətdir. Ölkəmizdə belə bir mötəbər yarışın keçirilməsi qürurvericidir. Fürsətdən istifadə edib gözəl nəticə qazanmaq, öz ölkəmizdə bayrağımızı qaldıraraq himnimizi səsləndirmək istəyirik".

Dövlət Sərhəd Xidmətinin, həmçinin Gənclər və İdman Nazirliyinin təşkilatçılığı ilə keçiriləcək hərbçilər arasında dünya çempionatı 27 noyabr - 3 dekabr tarixlərini əhatə edəcək.