“Hər qadın həyat yoldaşını həftədə 3-4 dəfə hokkeyə buraxmır”

Rusiya Hokkey Federasiyasının prezidenti, əfsanəvi hokkeyçi Vladislav Tretyak Kontinental Hokkey Liqasına (KHL) olan azarkeş marağından danışıb.

Futbolxeber.az saytının məlumatına görə, 3 qat olimpiya çempionu KHL-in oyunlarına marağın müəyyən qədər azalmasının səbəblərini belə izah edib:

“Oyunlarının sayının artmasının həm müsbət, həm də mənfi cəhətləri var. Bəli, son zamanlar tamaşaçı sayı azalıb. Hər qadın həyat yoldaşını həftədə 3-4 dəfə hokkeyə buraxmır. Yorğunluq da öz sözünü deyir. Qarşılaşmalar arasındakı günlərin sayı azalıb və bu da komandalarda müəyyən qədər enişə səbəb olur. Uğursuzluq isə azarkeşlərin narazılığına gətirib çıxarır. Təqvim uzundu və buna hazır olmaq lazımdı”.

Tretyak oyun sayının artmasının müsbət tərəfləri barədə isə bunları söyləyib:  

“Xeyli sayda gənc hokkeyçi üzə çıxıb. Oyunların sayının artması gənclər üçün özlərini göstərmək baxımından yaxşı şansdı. Hazırkı təqvim xoşuma gəlir. Məncə, çempionat da kifayət qədər maraqlı keçir”.

Qeyd edək ki, cari mövsüm KHL-də turların sayı 56-dan 68-ə yüksəlib.