Orucov "bürünc"ü də əldən verdi

Azərbaycan cüdoçusu, milli komandamızın bayraqdarı Rüstəm Orucov Tokio-2020 Yay Olimpiya Oyunlarında mübarizəyə başlayıb.

Futbolxeber.az saytının məlumatına görə, 73 kq çəki dərəcəsində çıxış edən idmançımız 1/16 final mərhələsində rusiyalı Mua Moquşkovla qarşlaşıb. Vazari ilə qalib gələn Rüstəm Orucov 1/8 finala yüksəlib.

O, bu mərhələdə Somon Makhmadbekovla (Tacikistan) görüşüb. Orucov bu qarşılaşmada da vazari ilə qələbə qazanaraq 1/4 finala adlayıb.

Bu mərhələdə cüdoçumuz Yaponiya idmançısı, Rio-2016 Olimpiya Oyunlarının qalibi, 6 qat dünya çempionu olan Ono Şohei ilə üz-üzə gəlib.

Rio-2016-nın və 2019-cu il dünya çempionatının finalında olduğu kimi, Orucov bu dəfə də 6 ildir məğlubiyyətin nə oduğunu bilməyən Onoya uduzub.

Nəticədə Orucov bürünc medal uğrunda təsəlliverici görüşlərə qatılıb. Cüdoçumuzun ilk rəqibi Kosovo idmançısı Akil Gjakova olub. Rəqibini vazari ilə üstələyən cüdoçumuz bürünc medal şansını davam etdirib. Medal qazanmaq üçün Rüstəm Orucon son görüşündə qələbə qazanmalı idi.

Lakin bürünc medal uğrunda həlledici görüşdə cənubi koreyalı An Çanq Rim qələbə qazanmaqla bayraqdarımızı medalsız qoyub.