“Bu yarışın bizə - Bakıya nə xeyri var” deyənlərə ən yaxşı cavab...

Bakı növbəti dəfə mötəbər idman yarışına ev sahibliyi etdi. 5-9 iyun tarixlərində velosiped idmanının BMX növü üzrə dünya çempionatı məhz paytaxtımızda keçirildi. 43 ölkədən 1500-dən artıq idmançının qatıldığı dünya çempionatı çox yüksək səviyyədə təşkil olunmuşdu. Bu da gözlənilən idi. Çünki həm paytaxtımız artıq mötəbər yarışları yüksək səviyyədə ev sahibliyi etməyi ilə ad çıxarıb, həm də Azərbaycan Velosiped İdmanı Federasiyasının hər il “Tour d`Azerbaijan”ı hansı səviyyədə keçirdiyinə şahidlik edirik.

BMX üzrə dünya çempionatının gedişatı, nəticələr barədə yarış boyu oxucularımızı mütəmadi olaraq məlumatlandırmışıq. İndi başqa məqama toxunmaq istərdik.

Adətən Bakı bəzi mötəbər yarışları qəbul edərkən ev sahibi kimi iştirakçıların müəyyən xərclərini ödəməli olur. Bu isə insanlarda narazılıq yaradır. Lakin BMX üzrə dünya çempionatı bu baxımdan istisna təşkil edirdi. Bu məqamı hələ yarışdan 2 gün öncə keçirilən mətbuat konfransında Azərbaycan Velosiped İdmanı Federasiyasının birinci vitse-prezidenti, Avropa Velosipedçilər Birliyi Rəhbər Komitəsinin üzvü Sahib Ələkbərov da qeyd etmişdi. Çempionat zamanı gördüklərimiz də bunu təsdiqlədi.

43 ölkədən 1500-dən çox idmançı Bakıya təşrif buyurmuşdu. Onlar böyük hissəsi yeniyetmələr olduğu üçün həmin əcnəbi idmançılar ölkəmizə valideynləri ilə gəlmişdilər. Hətta elə idmançı var idi ki, özü ilə birgə 6-7 nəfər yarışı izləmək üçün Bakıdaydı. Bütün bunlar isə ölkəmizə maddi baxımdan sərfəlidi.

Təsəvvür edin, 1500 idmançının məşqçilərini, valideynlərini, tanışlarını, qohumlarını nəzərə alsaq, bu say bir neçə dəfə artır. Onların 1 həftəyə yaxın Bakıda qalmaları, qidalanmaları, nəqliyyatdan istifadə etmələri, yarış zamanı dünya çempionatının keçirildiyi ərazidə satılan içkilər, “fast food”lar, suvenirlər və s. bütün bunlar ölkəyə yarışın verdiyi xeyirdi.

Bilet satışını da unutmaq olmaz. Belə ki, uşaqlar üçün 1 günlük bilet 12, böyüklər üçün isə 38 manata satılırdı. Hər gün azarkeşlər üçün quraşdırılmış tribunaların təxminən 70-80 faizi dolu olurdu.