Ramil Quliyev: “Azərbaycan bayrağını qaldırmaq arzum idi”

ürkiyəni təmsil edən həmyerlimiz Ramil Quliyev yüngül atletika yarışında 200 metr məsafəyə qaçışda dünya çempionu adını qazanmasını şərh edib.

Futbolxeber.az saytının məlumatına görə, “TRT Spor”a müsahibəsində o bildirib ki, bu, onun üçün unudulmaz yarış olacaq: “Bir il idi ki bu yarışa hazırlaşırdım və uğur qazanacağıma inanırdım. Çalışacağam ki, Tokio Olimpiya Oyunlarında da qızıl qazanım”.

O, Üseyn Boltu da rəqibləri sırasında görmək istəyini bildirib: "Amma olmadı".

Qeyd edək ki, Ramil Quliyev qələbəsini Türkiyə və Azərbaycan bayraqları ilə qeyd edib. Bu məsələyə də münasibət bildirən idmançımız deyib: “Azərbaycanın bayrağını qaldırmaq mənim arzum idi və mən bunu etdim”.

Ramilin müqavilə ilə məxsus olduğu “Fənərbaxça” klubu da onun qələbəsinə münasibət bildirib. Klubun prezidenti Əziz Yıldırım deyib ki, bu qələbədən qürur hissi keçirirlər: “Ramil bu gün bir millət, iki dövlətin idmançısı olaraq bu qələbəni qazandı”.