Formula-1 Azərbaycan Qran-Prisi ilə əlaqədar 3 tribunanın quraşdırılmasına başlanılıb

Formula-1 Azərbaycan Qran-prisinə hazırlıq işləri davam edir. Futbolxeber.az-ın məlumatına görə, bu gündən Abşeron, Bulvar və Xəzər tribunalarının quraşdırılmasına başlanılıb.

 

Bunu “Bakı Şəhər Halqası” Əməliyyat Şirkətinin marketinq və kommunikasiya departamentinin rəhbəri Nigar Arpadarai AZƏRTAC-a açıqlamasında deyib.

 

N.Arpadarai bildirib ki, hazırda pit-binasında tikinti işləri tam sürətlə aparılır. Bununla yanaşı, Bakı şəhər halqasının keçdiyi küçələrdə təhlükəsizlik baryerlərinin quraşdırılması işləri görülür. Trekin Xaqani küçəsi, Bülbül prospekti və Zərifə Əliyeva küçəsindən keçən hissəsində baryerlər quraşdırılıb.

 

“Bu gündən etibarən Abşeron, Bulvar və Xəzər tribunalarının quraşdırılmasına başlanılıb. Bu tribunaların quraşıdırılması bir ay ərzində davam edəcək. Gələn ay isə digər tribunaların və təhlükəsizlik baryerlərinin quraşdırılması işləri yekunlaşacaq. Bu il trekin keçdiyi yollarda yeni asfalt qatı salınmayacaq. Niyazi küçəsindəki qəmbər daşları ilə örtülü yol isə asfaltlanacaq. Tikinti işlərinin əksəriyyəti gecə saatlarında aparılır. Bu il demək olar ki, tikinti işləri ilə bağlı hər hansı yol bağlanmayacaq”, deyə N.Arpadarai qeyd edib.