Rio-2016: Şərif Şərifov bürünc medal qazandı

Rio Yay Olimpiya Oyunlarında güləş yarışları davam edir. Futbolxeber.az saytının məlumatına görə, bu gün daha 2 güləşçimiz mübarizəyə qoşulub.

86 kq-da yarışan olimpiya çempionu Şərif Şərifov turnirə 1/8 finaldan start verib. Onun ilk rəqibi Şenqfenq Bi (Çin) olub. Güləşçimiz bu görüşdən inamlı qələbə ilə ayrılıb - 10:0.

O, 1/4 finalda Polşa təmsilçisi Mateus Baranovski ilə mübarizə aparıb. Bu dəfə 7:0 hesabı ilə qalib gələn Şərifov yarımfinala yüksəlib.

Güləşçimiz final uğrunda görüşdə dünya və Avropa çempionu, həmçinin "Bakı-2015" Avropa Oyunlarının qalibi Abdulrəşid Sadulayevlə (Rusiya) qarşılaşıb. 1:8 hesabı ilə uduzan idmançımız mübarizəni bürünc medal uğrunda davam etdirib.

Sonuncü görüşündə güləşçimiz venesuellalı Pedro Sebalosla üz-üzə gəlib Rəqibini məğlub edən Şərifov Rioda ölkəmizə növbəti bürünc medalı qazandırıb. Bununla da Şərifov ardıcıl ikinci dəfə olimpiadada medal qazanıb. Londonda birinci olan güləşçimiz, Rioda üçüncü yerlə kifayətlənib.

125 kq-da mübarizə aparan digər güləşçimiz Cəmaləddin Məhəmmədov turnirə 1/8 finaldan başlayıb. O, bu mərhələdə İvaylov Dlaqnevi (ABŞ) ilə qarşılaşıb və rəqibinə 5:6 hesabı ilə uduzub. İvaylov Dlaqnevi finala qədər irəliləyə bilmədiyindən Məhəmmədov mübarizəni dayandırıb.