Çempionumuz: “Qızıl medalı mənə prezidentimiz təqdim etdiyi üçün ikiqat xoşbəxtəm”

“Çox xoşbəxtəm. Həm qızıl medal qazanmışam, həm də o medalı mənə cənab Prezidentimiz İlham Əliyev təqdim edib. Buna görə özümü ikiqat xoşbəxt hiss edirəm”. Futbolxeber.az-ın məlumatına görə, bu sözləri “Azərtac”a müsahibəsində "Bakı-2015" birinci Avropa Oyunlarının boks yarışlarında Azərbaycan xalqına qələbə sevinci yaşadan ilk qızıl mükafatçımız Teymur Məmmədov deyib.

Final qarşılaşması barədə danışan Avropa Oyunlarının qalibi qeyd edib ki, döyüş o qədər də ağır keçməyib və rəqibindən güclü olub.

Gələcək planları barədə danışan Avropa Oyunlarının çempionu, məşqlərini davam etdirəcəyini vurğulayaraq deyib: "Qarşıma məqsəd qoymuşam ki, Olimpiadada iştirak edim. Dünya çempionatında lisenziya qazanmalıyam”.

Teymur Məmmədov deyib: "Məni bu günə qədər dəstəkləyən hər kəsə təşəkkür edirəm. Bu qələbəmdə azarkeşlərin də payı var. Yarımfinalda Rusiya idmançısına qalib gələndən sonra başa düşdüm ki, yalnız qələbə uğrunda mübarizə aparıb çempion olmalıyam".