“Bakı-2015”: İspan basketbolçu medal qazanacağına inanır

“Azarkeşlərin bizi birinci Avropa Oyunlarında medal qazana biləcək komandalar arasında görüb-görmədiyini bilmirəm. Lakin mən komandama güvənirəm və biz qalib gələ biləcəyik”. Futbolxeber.az-ın “Azərtac”a istinadən verdiyi məlumata görə, bu sözləri İspaniyanın 3x3 basketbol üzrə millisinin üzvü Martin Naço deyib.

O bildirib ki, komanda yoldaşlarına güvənir: “Xuan Vaskonun mərkəzi dairəyə yaxın və üçxallıq mövqedə gözləmə kimi istedadı var. O, 3x3 basketbolu necə oynamaq lazım olduğunu bilir. Vasko mənim tanıdığım ən ağıllı mərkəz oyunçularından biridir”.

Baş məşqçi Jaume Komasın basketbola və həyata aid fəlsəfəsini çox sevdiyini vurğulayan idmançı deyib: “Komasın mənə həmişə etibar etməsindən xoşum gəlir. Birinci Avropa Oyunlarında Sloveniya, Rumıniya və Litva arasında Serbiya millisini daha güclü komanda hesab edirəm. Millimiz Belçika, Rusiya və Türkiyə ilə birlikdə “B” qrupunda yer alıb. Bu qrupda Rusiya ilə oyunun gərgin keçəcəyini düşünürəm”.

M.Naço İspaniyanın birinci divizionu -“Endesa” liqasında mübarizə aparan “Tuenti Movil Estudiantes” klubunun heyətində 258 oyunda iştirak edib.