Ramiz Çovdarov: “Rəqiblər bizdən çəkinirlər, biz heç kimdən çəkinmirik”

“Mavritaniyanın oyununu izləmişdik. Bu dəqiqə rahat oyun yoxdur. Bəhreynlə görüşdə də azarkeşlər bizdən qələbə gözləyirdi. Sadəcə meydançanın ot örtüyü amili təsir etdi. Digər tərəfdən də, birinci oyunun elə keçməsi daha yaxşı oldu. Sonrakı matçlara daha ciddi hazırlaşdıq. Şükür Allaha, Bəhreynlə görüşdən sonra hər 2 matçda da elə qələbə qazandıq. Azarkeşlərimizə təşəkkür edirəm”.

Futbolxeber.az saytına müsahibəsində bu sözləri minifutbol üzrə milli komandamızın üzvü Ramiz Çovdarov Bakıda keçirilən dünya çempionatının qrup mərhələsini 7 xalla lider kimi başa vurmalarını şərh edərkən deyib.

O, istər fiziki, istərsə də mental olaraq dünya çempionluğuna hazır olduqlarını vurğulayıb: “Əsas odur ki, bircə zədə almayaq. Allah qoysa, sona qədər belə davam edəcəyik”.

Çovdarov 1/8 finalda dünya çempionu Rumıniyaya rəqib olmalarına belə münasibət bildirib: “Düzünü desəm, rəqibin kim olmasının fərqi yox idi. Pis çıxmasın, rəqib hansı komanda olursa-olsun, onsuz da bir komanda ilə qarşılaşacaqdıq. Doğrudur, Rumıniya da güclü komandadır, dünya çempionudur. Rəqiblər bizdən çəkinirlər, biz heç kimdən çəkinmirik. 1/8 finalda rəqibin kimliyindən asılı olmayaraq onu keçməliyik. Məqsədimiz çempion olmaqdır. İrəliyə baxırıq. Çempionluğa doğru gedəcəyik”.