Musa Qurbanlı: “Hər nə qədər çətinə düşsək də, hədəflərimiz dəyişmir”

“Qarabağ”ın hücumçusu Musa Qurbanlı Azərbaycan Premyer Liqasının XI turunda “Turan Tovuz”a qarşı keçirilən oyundan (0:1) sonra jurnalistlərin suallarını cavablandırıb. Futbolxeber.az saytının əməkdaşının da iştirak etdiyi müsahibəni təqdim edirik:

- Oyunla bağlı nə deyə bilərsiniz?

- Əlbəttə, təəssüflənirik. Məqsədimiz qələbə qazanmaq idi. Düzdür, asan olmayacağını bilirdik. Çünki “Turan Tovuz” son zamanlar yaxşı formadadır. “Zirə” və “Sabah”a qalib gəlmişdilər, “Neftçi” ilə heç-heçə oynamışdılar. Yəni bizi çətin oyun gözləyirdi. Buna baxmayaraq, qələbə qazanacağımıza inanırdıq. Təəssüf ki, alınmadı.

- “Qarabağ” artıq 3 oyundur qol vura bilmir. Bunun səbəbi nədir?

- Səbəbi dəqiq deyə bilmərəm. Qol vura bilmiriksə, deməli, nələrsə çatışmır. Məşqçilər oyunları analiz edirlər. İnanıram ki, növbəti matçlarda fərqlənə biləcəyik.  

- Son zamanlar az oynayırsınız...

- Mən həmişə üzərimdə çalışıram. Məşqlərdə əlimdən gələni edirəm.

- “Qarabağ”ın hədəfləri dəyişməyib?

- Xeyr, hədəfimiz çempionluqdur. Düzdür, son xal itkiləri ilə işimizi çətinə saldıq. Lakin sonuna qədər döyüşəcəyik, məqsədimizdən əl çəkməyəcəyik.

- Ümumiyyətlə, uğursuzluğun səbəbini konkret nədə görürsünüz?

- Əvvəldən çempionatın gərgin keçəcəyi bəlli idi. İddialıların sayı artıb. Rəqiblər güclüdür. Buna baxmayaraq, çalışacağıq vəziyyətdən çıxaq.

- Növbəti turda səfərdə “Kəpəz”in qonağı olacaqsınız. Həmin matçdan gözləntiləriniz?

- Məqsədimiz qələbədir. Hər nə qədər çətinə düşsək də, hədəflərimiz dəyişmir. Futbolda belə hallar olur, bəzən nələrsə çatışmır. İnanıram ki, növbəti oyunlarda istəyimizə çatacağıq.