“Bakıdakı dünya çempionatı tarixdə olan ən yaxşı minifutbol yarışıdır”

Dünya Minifutbol Federasiyasının vitse-prezidenti Peter Kralik azərbaycanlı jurnalistlərin suallarını cavablandırıb. Futbolxeber.az saytının əməkdaşının da iştirak etdiyi müsahibəni təqdim edirik:

- Bakıda keçirilən minifutbol üzrə dünya çempionatının artıq 5 günü geridə qalır. Mundialla bağlı təəssüratlarınız necədir?

- Bu, tarixdə olan ən yaxşı minifutbol yarışıdır. Təşkilatçılar çox böyük iş görüblər. Arena, nəqliyyat, qidalanma, məskunlaşma – bir sözlə, hər şey mükəmməldir. Bu dünya çempionatı minifutbolu daha yüksəklərə qaldıracaq. Həm də gələcək üçün qapıları açacaq. Mən Slovakiyadanam. Şadam ki, 2022-ci ildə Azərbaycan məhz Slovakiyada Avropa çempionu oldu. Həmin qalibiyyət bu gün dünya çempionatının Azərbaycanda keçirilməsində böyük rol oynadı.

- Lakin Slovakiya millisi Bakıda qrupda qaldı...

- Bu, idmandır. Bu gün Azərbaycan millisi də uduza bilərdi. Yaxud son dünya çempionu Rumıniya yığması da 2 turdan sonra hələ növbəti mərhələyə vəsiqə qazanmayıb.

- Bakıdakı yarışı əvvəlki dünya çempionatları ilə müqayisə etdikdə hansı fərqlər var?

- Fərqlər çoxdur. BƏƏ-dəki son çempionatda oyunların keçirildiyi stadion sahildə, açıq havada tikilmişdi. Bu gün Azərbaycan minifutbolda ölkə ən güclü 3 ölkədən biridir. Eləcə də dövlət dəstəyini də qeyd etmək istərdik.

- Dünya çempionatında Azərbaycan millisindən gözləntiləriniz nədir?

- Çox çətin olacaq. Slovakiya Avropa çempionatına ev sahibliyi edərkən bu təcrübəni yaşamışıq. Azərbaycan ev sahibi olduğu üçün komandadan gözləntilər çoxdur, istər azarkeşlər, istərsə də media tərəfindən.
- Minifutbolun peşəkar səviyyədə qəbulu üçün federasiya olaraq hansı addımlar atırsınız? FİFA ilə danışıqlar gedirmi?

- Minifutbolu inkişaf etdirməyə çalışırıq. Bunun üçün bir federasiyanın, qurumun köməyi bəs etmir. İdman növlərinin 99 faizi həvəskardır, yalnız bir faizi peşəkardır. Futbolda, basketbolda, voleybolda peşəkar idmançılar ola bilər. Amma ümumi götürdükdə, bu, yalnız 1 faiz təşkil edir.

- Bəs gələcəkdə minifutbolun Olimpiya Oyunlarının proqramına daxil edilməsi mümkündürmü?

- Məncə, olimpiadanın proqramının yeni idman növlərinə ehtiyacı var, yenilənmə olmalıdır. Bu baxımdan minifutbol çox gözəl idman növüdür.

İbrahim Cəfərov