Millimizin baş məşqçisi qələbəni şərh etdi: “Heç bir rəqib bizimlə açıq futbol oynamır”

“Öncə bizə dəstək olan xalqımıza təşəkkür edirəm. Azarkeşlər sona kimi bizə dəstək oldular. Onların da sayəsində qələbə qazandıq”.

Futbolxeber.az saytının məlumatına görə, bu sözləri minifutbol üzrə milli komandamızın baş məşqçisi Elşad Quliyev dünya çempionatının qrup mərhələsinin son turunda Mavritaniyaya 2:0 hesabı ilə qalib gəldikləri oyundan sonra deyib.

Jurnalistlərin suallarını cavablandıran mütəxəssis komandasının yaxşı oyun sərgilədiyini bildirib: “Sona qədər çalışdıq ki, rəqibin müdafiəsini yaraq. İstəyimizə yalnız sona yaxın çatdıq. Komandamı təbrik edirəm. Çox yaxşı oyun sərgilədik”.

O, millimizin işinin ikiqat çətin olduğunu vurğulayıb: “Hər oyun digərindən çətin keçir. Çünki rəqiblər də komandamızı analiz edirlər. Heç bir rəqib bizimlə açıq futbol oynamır. Hamısı müdafiədən oynayırlar. Bu da bizim üçün ikiqat çətin olur”.

İbrahim Cəfərov