Portuqaliya millisinin baş məşqçisi: “3 favoritdən biri Azərbaycandır, biri biz, biri də...”

“Bu gün ardıcıl üçüncü qələbəmizi qazandıq. Təbii ki, qalib gəlmək sevindiricidir. Lakin daha çox işləməliyik. Oyunumuzu yaxşılaşdırmalıyıq. Çünki birlikdə çox az oyun keçirmişik”.

Futbolxeber.az saytına açıqlamasında bu sözləri Bakıda keçirilən minifutbol üzrə dünya çempionatında qrup mərhələsini maksimum nəticə ilə başa vuran Portuqaliya yığmasının baş məşqçisi Silva Sergio Daniel deyib.

Mütəxəssis qeyd edib ki, 3 komandanı dünya çempionatının favoriti qismində görür: “Əsas favoritlərdən biri təbii ki, meydan sahibi komandadır. Azərbaycan yığması çox güclüdür. Favoritlərdən danışırıqsa, Rumıniyanı da unutmaq olmaz. Üçüncü favorit də Portuqaliyadır (gülür). Lakin yenə deyirəm ki, böyük uğur qazanmaq üçün daha çox çalışmalıyıq”.

Portuqaliyalı mütəxəssis Azərbaycan Minifutbol Federasiyasının təşkilatçılığından razı qaldığını vurğulayıb: “Təşkilatçılıq əladır. Dünya çempionatı çox yüksək səviyyədə təşkil olunur. Azərbaycanı da çox bəyəndim. Bakı gözəl şəhərdir. Burada olmaqdan məmnunuq”.  

İbrahim Cəfərov