İsrail millisinin oynayan baş məşqçisi: “Ən yaxşı futbolçumuz azərbaycanlıdır”

Bakıda keçirilən minifutbol üzrə dünya çempionatında çıxış edən İsrail millisinin oynayan baş məşqçisi Yuval Şabtayın Futbolxeber.az saytına müsahibəsi

- Bakıda keçirilən minifutbol üzrə dünya çempionatına uğursuz start versəniz də, bu gün Qana üzərində 4:0 hesablı qələbə qazandınız. Qarşılaşma barədə nə deyə bilərsiniz?

- Çox yaxşı oyun keçirdik. Turnirdə ilk qələbəmizi qazandıq. Arzu edirəm ki, növbəti matçlarda bu qələbənin ardını gətirək.

- Qrupdakı son matçda İspaniya ilə üz-üzə gələcəksiniz. Həmin oyunda qələbə qazanmaq şansını necə dəyərləndirirsiniz?

- Çox çətin olacaq. İspanların çox yaxşı komandaları var. Lakin mərhələ adlamaq üçün biz mütləq qalib gəlməliyik.

- Siz həm baş məşqçisiniz, həm də oyunçu. İkisini birdən yerinə yetirmək nə dərəcədə çətindir?

- Əlbəttə, bu, çox çətindir. Çünki oyunçu kimi həmişə meydanda olmaq istəyirəm (gülür). Amma baş məşqçi kimi komandanı düşünməliyəm. Oyunçuların hamısı dostlarımdır. Buna görə əvəzetmə etmək də bəzən asan olmur. Lakin bütün bunlar nə qədər çətin olsa da, hamımız başa düşürük ki, önəmli olan komandanın uğurudur.

- Bakıda keçirilən dünya çempionatının təşkilatçılığından razısınız?

- Əlbəttə. Təşkilatçılıq möhtəşəmdir. Oyunların keçirildiyi stadion, komandalar üçün yaradılan şərait, bir sözlə, hər şey əladır. Dünən şəhəri gəzmək imkanımız oldu. İçərişəhərdə olduq, çox gözəl yerlər idi. Bakını çox bəyəndim.

- Uzun illər böyük futbolla məşğul olmusunuz, İsrailin müxtəlif klublarında çıxış etmisiniz. Nə vaxtsa avrokuboklarda Azərbaycan klublarına qarşı oynamısınız?

- Düzdür, “Hapoel Beerşava”nın heyətində avrokuboklarda forma geymişəm. Lakin Azərbaycan klublarına qarşı oynamamışam.

- İsraildə xeyli azərbaycanlı yaşayır. Təsadüfən komandanızda əslən Azərbaycandan olan oyunçu yoxdur?

- Sizə bir sirr açım (gülür). Əslində, komandamızın ən yaxşı oyunçusu Maksim Xayo azərbaycanlıdır. O, komandamızın aparıcı üzvüdür. Lakin təəssüf ki, bu yarışda zədə səbəbindən bizə kömək edə bilmir.

- Dünya çempionatının favoriti qismində hansı komandaların adlarını çəkə bilərsiniz?

- Biz Millətlər Liqasında Rumıniyaya qarşı oynamışdıq. Onlar çox güclüdürlər. Bakıda isə ilk matçda Serbiya ilə üz-üzə gəldik. Serblərin də favoritlərdən biri olduğunu söyləməliyəm. Lakin bu dünya çempionatında hər oyun çətin keçir. Dünən Çadın sürpriz şəkildə Rumıniyanı məğlub etməsi də buna sübutdur.

İbrahim Cəfərov