Təmkin Xəlilzadə: “Heç kim təslim olmadı, hamı xarakter göstərdi”

“Çox maraqlı turnir oldu. Ümumilikdə yarış çox ağır idi. Əslində, gedəndə bizi nə gözlədiyini bilirdik. Məlum idi ki, finala qədər irələmək üçün 4 gündə 7 oyun keçirməliydik”.

Futbolxeber.az saytına açıqlamasında bu sözləri “Birbaşa Bakı”nın heyətində Çempionlar Liqasının qalibi olan Təmkin Xəlilzadə deyib.

Təcrübəli futbolçu qitənin 1 nömrəli klub turnirinə ciddi hazırlaşdıqlarını bildirib: " Bakıda 1 ay, ayyarım hazırlıq keçmişdik, yoxlama oyunlarında qüvvəmizi sınamışdıq. Çox şükür ki, baş məşqçimizin verdiyi tapşırıqları yerinə yetirdik və sonda qalib olmağı bacardıq. Təbii ki, çempionluq asan olmadı. Uşaqlarda yorğunluq olurdu, zədəlilərimiz var idi. Bütün bunlara baxmayaraq, heç kim təslim olmadı, hamı xarakter göstərdi. Azərbaycanı layiqincə təmsil etdik və kuboku ölkəmizdə gətirdik”.

T.Xəlilzadə turnirin ən yaxşı oyunçusu seçilməsinə belə münasibət bildirib: “Təbii ki, Çempionlar Liqasının ən yaxşı oyunçusu seçildiyim üçün çox xoşbəxtəm. Bu, əlavə stimuldur. Amma bombardirlik, yaxud ən yaxşı olmaq fərq etmir. Əsas məqsədimiz komanda olaraq kuboku başımız üzərinə qaldırmaq idi. Şükürlər olsun ki, buna da nail olduq. Ən yaxşı seçilmək futbolçu həyatında stimuldur. Məsuliyyət daha da artır. Çünki azarkeşlər də artıq səndən çox şey gözləyirlər. Ona görə daha da artırmalısan”.

İbrahim Cəfərov