“Sumqayıt”dan şəhərin yaşlı sakinlərinə dəstək

"Sumqayıt”ın futbolçuları “Evdə qal, sağlam qal” adlı aksiya çərçivəsində eyniadlı şəhərin yaşlı sakinləri ilə evlərində görüşüblər.

Futbolxeber.az-ın klubun rəsmi saytına istinadən verdiyi məlumata görə, görüşdə “Sumqayıt”ın əsas komandasının məşqçiləri - Mehman Yunusov, Eduardo Balada, eyni zamanda futbolçular - Mehdi Cənnətov, Elvin Bədəlov, Cəmaləddin Xocaniyazov, Rüfət Abdullazadə, Səbuhi Abdullazadə, Mehdi Şərifi və Xəyal Nəcəfov iştirak edib.

Xüsusi karantin müddəti boyunca onlara evdən çıxmamağı məsləhət görən komandanın üzvlərinə şəhər sakinləri belə çətin günlərdə yaşlıları unutmadıqları üçün çox sağ ol deyib və qayğıya görə öz dərin minnətdarlıqlarını bildiriblər.

Yaşlı sakinlər futbolçular tərəfindən ərzaq tədarükü ilə təmin olunub. “Evdə qal, sağlam qal” adlı aksiyası mütəmadi olaraq “Sumqayıt” FK tərəfindən davam etdiriləcək.