Bir təbrikə dəymədi?

Əvvəl çoxları dekabrın 1-i gecəsini səbirsizliklə gözləyərdi. 1-dən 2-nə keçən gecə, 00:01 olan kimi saytları Hafiz Məmmədovun şəkli, ad günü təbriki, videolar bəzəyirdi.

Sırf maraq xatirinə gecə bir çox saytlara göz gəzdirdim və təəssüf ki, Hafiz Məmmədovun 55 yaşının tamam olması ilə bağlı təbrikə, xəbərə yalnız 3-4 yerdə rast gəlmək mümkündü. Acınacaqlı mənzərədi. Məlum məsələdir ki, Hafiz Məmmədovun o təbriklərə ehtiyacı da yoxdu. Amma necə deyərlər, iş sosiskada deyil, “vnimatelnı” olmaqdadı. Bu gün də yanında olanlar, hər zaman ona sadiq övladları, dostları, işçiləri, dünəndən bu yana Hafiz bəyi axtaran keçmiş məşqçiləri, futbolçuları ona yetər.

Təəssüf ki, əksəriyyət yaxın keçmişi unudub. Uzun illər və bu gün də Hafiz Məmmədovun yanında olan biri kimi onun kimlərə nə etdiyini çox yaxşı bilirəm. Özü bu barədə danışmağı xoşlamasa da, fakt budur ki, Hafiz Məmmədovun hesabına çoxu əyninə şalvar geyinsə də, hamı kişiliyini qoruya bilmədi.

“Bakı”nın sayəsində xarici ölkələrə səfər edənlər, hər ay yüksək məbləğdə “reklam pulu” alanlar, Hafiz Məmmədovla hər görüşdən əli(cibi)boş çıxmayanlar, onun sayəsində ev-eşik sahibi olanlar, maşın alanlar, mağaza açanlar, müqəddəs yerləri ziyarət edənlərin bu gün Hafiz Məmmədovun 55 yaşının tamam olması ilə bağlı bir xəbər verməyə cəsarətləri çatmadı. Sizin kişiliyinizə...

Döyüş əldən gedə bilər, amma müharibə hələ bitməyib, qabaqdadı. Hafiz Məmmədov yıxılmayıb, yıxılmayacaq da. Çətin günlər hamının həyatında olur. 50-də başlayan sıxıntılı günlər 55-də bitəcək. Yenə o günlər qayıdacaq. Yenə siz “Bakı”nın bazasının qapısında, Hafiz Məmmədovun maşının yanında növbəyə dayanacaqsız. Amma bu dəfə o qapıdan içəri keçə bilməyəcəksiz.

Çörəyi dizinin üstündə olanlar Hafiz Məmmədovu “unutsalar” da, Hafiz Məmmədov adını, imzasını heç kim Azərbaycan futbolu tarixindən silə bilməz. “Bakı” bu gün fəaliyyətini müvəqqəti olaraq dayandırsa da, Hafiz Məmmədov Azərbaycan futboluna çox xeyir verib. “Bakı”, Azərbaycan futbolu üçün o cür baza tikib. Həmin bazada yüzlərlə Azərbaycan gənci futbolun sirlərinə yiyələnib. Bu gün “Bakı”nın yetirmələri olan 30 nəfər Azərbaycanın müxtəlif yaş qrupları üzrə milli komandalarında çıxış edir. Hazırda Azərbaycan Premyer Liqasında çıxış edən əksər klubların heyətində minimum “Bakı”nın 1 yetirməsi var. Hafiz Məmmədovun ideyası olan “Land of fire Azerbaijan” brendi bütün dünyada məşhurlaşıb. Bu brendin sayəsində yüz minlərlə insan Azərbaycanı tanıyıb. Əmin olun, Hafiz Məmmədov Azərbaycan futbolu, eləcə də ölkə iqtisadiyyatı tarixində hələ son sözünü deməyib...

Ad gününüz bir daha mübarək, Hafiz bəy! Bu ölkənin insanına etdiyiniz yaxşılıqları nankorlar unutsalar da, çoxları sizin necə biri olduğunuzu bilir. Allah ürəyinizə görə versin, verib, verəcək də. Tezliklə bütün problemlərin aradan qalxması ümidi ilə.

İBRAHİM