“Şapekoense” üçün növbəti fəlakət: Ölümdən döndülər

Bir müddət öncə faciəvi təyyarə qəzası keçirən “Şapekoense” klubunun başı bəladən qurtulmur. Futbolxeber.az-ın məlumatına görə, Braziliya komandası növbəti dəfə böyük fəlakətlə üzləşib. 

 

Yerli mətbuatda bildirilir ki, hadisə Libertadores Kuboku çərçivəsində “Lanus”la səfərdə üz-üzə gələn “Şapekoense” (2:1) Argentinadan qayıdarkən yaşanıb. Komandanı daşıyan təyyarə Portu-Aleqri şəhərindəki hava limanına məcburi eniş etməli olub. Buna Şapeko aeroportunun “hava gəmisi”ni qəbul etməyə hazır olmaması səbəb olub. Hadisədən qorxuya düşən futbolçu və məşqçi heyəti evə onlar üçün ayırılmış avtobusla yollanıblar.

 

Qeyd edək ki, ötən il noyabrın 29-da "Şapekoense" klubunun üzvlərini daşıyan təyyarə Kolumbiyanın Medelyin şəhərində qəzaya uğramışdı. Qəza nəticəsində “hava gəmisi”ndə olan 81 nəfərdən 77-si dünyasını dəyişmişdi.