З днем народження, Шева

Bu gün Ukrayna futbolunun canlı əfsanəsi Andrey Şevçenkonun 40 yaşı tamam olur. Futbolxeber.az saytının məlumatına görə, veteran futbolçu 1976-cı ilin 29 sentyabrında Kiyev oblastının Yaqotinski rayonunun Dvorkovşina kəndində dünyaya göz açıb.

1993-cü ildə peşəkar karyerasına Kiyev “Dinamo”sunda başlayıb. 1999-cu ildə “Milan”a transfer olunan Şeva karyerasının ən parlaq illərini məhz bu klubda keçirib. 2006-cı ildə “Çelsi”yə transfer olunan hücumçunun karyerasında eniş başlayıb. London klubunda 3 mövsüm ərzində cəmi 9 qol vuran Şevşenko daha sonra “Milan”a qayıtsa da, əvvəlki hücumçunu xatırlatmayıb. 2012-ci ildə karyerasını doğma “Dinamo”da başa vurub. Peşəkar karyerası ərzində 446 oyunda 219 dəfə fərqlənib ki, bu qolların yarısından çoxunu (127) “Milan”da vurub.

Şevçenko “Dinamo”nun heyətində 5 dəfə Ukrayna çempionu (1994/95, 1995/96, 1996/97, 1997/98, 1998/99) olub. 3 dəfə ölkə kubokunu (1995/96, 1997/98, 1998/99), 1 dəfə Ukrayna Superkubokunu (2011), 3 dəfə də “Birlik Kuboku”nu (1996, 1997, 1998) qazanıb.

“Milan”ın heyətində 2003/04 mövsümündə “A” seriyasının, 2002/03 mövsümündə İtaliya kubokunun, 2004-cü ildə İtaliya Superkubokunun, 2002/03 mövsümündə Çempionlar Liqasının, 2003-cü ildə UEFA Superkubokunun qalibi olub.

“Çelsi” ilə birgə isə Şeva İngiltərə Kubokunu (2006/07), İngiltərə Liqa Kubokunu (2006/07) və İngiltərə Superkubokunu (2009) qazanıb.

Fərdi olaraq isə Şevçenko 50 mükafata sahib çıxıb.