Azərbaycan klublarının rəsmiləri mötəbər tədbirdə iştirak ediblər

Avropa Futbol Klublarının (EFC) 33-cü Baş Assambleyası keçirilib.

Futbolxeber.az saytının məlumatına görə, tədbirdə quruma üzv olan Azərbaycan klublarının nümayəndələri də iştirak ediblər.

Azərbaycanı Assambleyada “Qarabağ”, “Sabah”, “Neftçi”, “Zirə”, “Turan Tovuz”, “Sumqayıt”, “Şəfa” və “İmişli” klublarının rəsmiləri təmsil edirlər. “Araz-Naxçıvan” isə üzrlü səbəbdən tədbirə qatılmayıb.

Tədbirdə EFC prezidenti Nassir Əl-Xelaifi, UEFA prezidenti Aleksander Çeferin iştirak ediblər.

Qeyd edək ki, özündə 900-dən çox klubu birləşdirən Avropa Futbol Klubları qitənin peşəkar futbol klublarını təmsil edən, UEFA və FİFA tərəfindən tanınan klub təşkilatıdır. Qurumun qərarverici orqanı olan İcraiyyə Komitəsinin üzvləri sırasında “Qarabağ” klubunun İdarə Heyətinin üzvü Asif Əsgərov da var.

Baş Assambleyada Avropa klub futbolunun aktual məsələləri, klubların maraqlarının qorunması və beynəlxalq futbol qurumları ilə əməkdaşlıq müzakirə olunub.