“Neftçi”nin bombardiri: “Hazırda rəqəmlərə o qədər də önəm vermirəm”

“Neftçi”nin futbolçusu Breno Almeyda Azərbaycan Premyer Liqasının II turunda "Araz-Naxçıvan"a 5:0 hesabı ilə qalib gəldikləri qarşılaşma barədə danışıb.

Futbolxeber.az saytının məlumatına görə, 28 yaşlı vinger nəticədən məmnunluğunu ifadə edib:

“İlk növbədə Allaha təşəkkür edirəm. Komandamı təbrik edirəm. Çünki bu, böyük əziyyətin bəhrəsidir”.

2 turdan sonra 4 qolla çempionatın bombardiri olan 28 yaşlı vinger bu barədə çox düşünmədiyini vurğulayıb: “Hazırda statistikalara, rəqəmlərə o qədər də önəm vermirəm. Mənim əsas məqsədim yaxşı məşqlər etmək və oyunlara köklənməkdir. Bundan sonra nəticə öz-özünə gələcək”.

Braziliyalı futbolçu növbəti tur barədə geniş danışmayıb: “Artıq istirahət edəcəyik, dincələcəyik. Sonra "Zirə" ilə matçı düşünməliyik”.