Qurban Qurbanov: "Heyətdə dəyişikliklər ola bilər"

"Qarabağ" UEFA Avropa Liqasının 1-ci təsnifat mərhələsində İslandiyanın "Vestri" klubu ilə cavab oyununa çıxacaq.

Futbolxeber.az saytının məlumatına görə, Ağdam təmsilçisinin baş məşqçisi Qurban Qurbanov səfər matçından öncə komandanın hazırlıq durumu barədə fikirlərini bölüşüb:

"Ümumən komanda oyuna tam hazırdır. Çünki rəqibi yaxından tanımışıq və analiz etmişik. Uzun yol gəlmişik və yolda olduğumuz üçün təbii ki, müəyyən qədər yorğunluq var. Buna baxmayaraq ümid edirəm ki, futbolçularımız sabahkı matça tam hazır olacaq və motivasiyalarını qoruyacaqlar.

Düzdür, bir qədər hava soyuqdur, amma əsl futbol oynamaq havasıdır. Heyətdə müəyyən dəyişikliklər ola bilər. Lakin kimin meydana çıxmasından asılı olmayaraq hər kəs əlindən gələni edəcək. Start heyəti ilə bağlı qərar vermək üçün sabaha qədər hələ vaxtımız var. Çalışacağıq ki, oyundan öncə konkret fikrimizi müəyyənləşdirib həyata keçirək".