Riad Rəfiyev Braziliya təəssüratlarını bölüşdü: “Məhsuldar və yaddaqalan səfər idi”

“Sumqayıt”ın prezidenti Riad Rəfiyev Braziliyada işgüzar səfərə olub.

Futbolxeber.az saytının məlumatına görə, bu barədə o, sosial şəbəkə hesabında paylaşım edib.

“İyirmi il əvvəl bu gözəl ölkədə iki il yaşamışdım. Uzun illərdən sonra yenidən Braziliyaya qayıtmaq mənim üçün böyük sevinc oldu və çox gözəl xatirələri yenidən yaşatdı.

Bu dəfə Braziliyaya "Sumqayıt" FK-nın rəhbəri kimi iki həftəlik işgüzar səfər çərçivəsində qayıtdım. San-Paulo, Rio De Janeiro və Fortaleza şəhərlərində oldum. Səfər zamanı klub rəhbərləri, skautlar və agentlərlə görüşmək, Fortaleza, Ceará, Botafogo və Ferroviário klublarını ziyarət etmək, həmçinin A, B, C və D Seriyalarında ümumilikdə 12 oyunu izləmək imkanı əldə etdim.

Uzun illərdir görmədiyim köhnə dostlarımla yenidən görüşmək də bu səfərin ən xoş anlarından biri oldu.

Dəyərli görüşlər, yeni əlaqələr və Braziliya futbolunu daha yaxından tanımaq baxımından olduqca məhsuldar və yaddaqalan bir səfər idi”, - deyə R.Rəfiyev bildirib.