“Neftçi”nin yeni transferi tibbi müayinədən uğurla keçdi

"Neftçi”nin yeni transferi Lümobir Tupta artıq Bakıdadır.

Futbolxeber.az saytının məlumatına görə, Slovakiya millisinin hücumçusu tibbi müayinədən uğurla keçib. O, qarşıdakı saatlarda “Neftçi” ilə rəsmi müqavilə imzalayacaq.

Qeyd edək ki, hücumun həm mərkəzində, həm də cinahında çıxış edən Tupta peşəkar karyerasına İtaliyanın “Verona” klubunda başlayıb. Daha sonra o, müxtəlif vaxtlarda “Visla” (Polşa), “Askoli” (İtaliya), “Sion” (İsveçrə), “Slovan” (Çexiya), “Peskara” (İtaliya) və “Vidzev”də (Polşa) forma geyib.

Slovakiyalı forvardın son klubu isə “Larissa” olub. 2025-ci ildən çıxış etdiyi Yunanıstan klubunda o, 35 matçda 8 qol vurub.

Lümobir Tupta Slovakiyanın U-17 (6 oyun, 3 qol), U-18 (6 oyun, 1 qol), U-19 (9 oyun, 4 qol) və U-21 (12 oyun, 5 qol) yığmalarında forma geydikdən sonra 2023-cü ildə əsas millidə debüt edib.