Samuel Lobato: “Arzularımdan biri “Qarabağ”la çempion olmaqdır”

“Bilirdim ki, “Qarabağ”dan mənə qarşı maraq var. Müqavilə ilə məxsus olduğum “Portimonense” ilə danışırlar. Klubu araşdırdım, gördüm ki, hər şey ürəyimcədir”.

Futbolxeber.az saytının məlumatına görə, bu sözləri “Qarabağ”ın yeni transferlərindən olan Samuel Lobato deyib.

Portuqaliyalı yarımmüdafiəçi yeni klubu ilə uğurlar qazanmaq istədiyini bildirib: “Qərar verdim ki, təklifi qəbul edim. Arzularımdan biri çempion olmaq, “Qarabağ”la uğurlar əldə etməkdir”.

“Niyə məhz “Qarabağ”ı seçdiniz?” sualını 24 yaşlı futbolçu belə cavablandırıb: “Qarabağ”ın transferə yanaşması fərqli idi. Müntəzəm kontaktda idik. Başa düşdüm ki, klub məni heyətində görməyi çox istəyir”.

Lobato “Qarabağ”ın hücumçusu Kamilo Duranla daha əvvəl komanda yoldaşı olduğunu vurğulayıb: “Əlbəttə, “Qarabağ”dan təklif gələrkən klub haqda məlumat topladım. Kamilo Duran komanda yoldaşım olub. O, həm klub, həm çempionat barədə mənə kifayət qədər məlumat verdi. Bilirəm ki, Azərbaycan Premyer Liqası rəqabətli çempionatdır. Bu liqadan zamanla daha səviyyəli çempionata keçmək üçün tramplin kimi istifadə etmək olar”.