Ehtiram Quliyev: “Turan Tovuz” tək bir şəhərin deyil, bütün Qərb bölgəsinin komandasıdır”

“Bütün “Turan Tovuz” azarkeşlərini təbrik edirəm”.

Futbolxeber.az saytının məlumatına görə, bu sözləri “Turan Tovuz”un İdarə Heyətinin sədri Ehtiram Quliyev klubun mətbuat xidmətinə açıqlamasında deyib.

O, avrokuboklara vəsiqə qazanmalarına belə münasibət bildirib: “32 illik həsrətdən sonra buna nail olduq. Şəhərimizə yeni sevinc və həyəcan gəldi. Futbol festivalını yaşadıq. İlk növbədə baş məşqçimizə, futbolçulara, ən çox da azarkeşlərə minnətdaram. Fanatlarımızı bu il çox üzdük. İnanıram ki, xoş nəticə ilə sevinclərinə səbəb olarıq".

Quliyev azarkeşlərə şad xəbərinin olduğunu da deyib: "Əlimizdən gələni edirik ki, ilk avrokubok oyununu Tovuzda keçirək. Mövsüm ərzində fanatlarımız bizdən çox uzaq qalıblar. Bunun əvəzində onlara avrokubok matçı hədiyyə etmək istəyirik. Bütün azarkeşlərimizin gözü aydın olsun. Bölgə rayonlarından dəstək istəyirəm. Ağstafadan, Qazaxdan, Gədəbəydən, Şəmkirdən dəstək gözləyirik. "Turan Tovuz" tək bir şəhərin komandası deyil. Bütün Qərb bölgəsinin komandasıdır. Hər kəsi təbrik edirəm”.