“Xəzər Lənkəran”: 15-ci dəfə “Qarabağ”la səfərdə

“Xəzər Lənkəran” 2014-cü ildə ilk rəsmi oyununu Azərbaycan Premyer Liqasının XIX turunda keçirəcək. Futbolxeber.az-ın məlumatına görə, mövsümün ikinci yarısına Mustafa Dənizlinin yetirmələri "Qarabağ"a qarşı səfər oyunu ilə başlayacaq. Çempionatın lideri ilə qarşılaşma “ağ-yaşıllar”ın bu rəqiblə 29-cu dueli olacaq. Bakıda baş tutacaq matçadək Azərbaycan kubokunda 2 dəfə görüşən komandalar çempionat çərçivəsində 27-ci dəfə üz-üzə gələcək.

 İndiyədək keçirilən 28 qarşılaşmada “Qarabağ” daha çox qələbə qazanıb - 13 dəfə. “Xəzər Lənkəran” isə 11 dəfə rəqibindən üstün olub. Komandalardan hərəsi qələbələrindən birini ölkə kubokunda əldə edib. 4 görüşdə isə qalib müəyyənləşməyib. Top fərqində isə “Xəzər Lənkəran” üstünlüyə malikdir. Kubokda hər komanda eyni sayda - 2 qol vursa da, çempionatda qazanılan böyükhesablı qələbələr sayəsində “ağ-yaşıllar” cəmi iki top öndədir - 31:29. Ümumilikdə “Xəzər Lənkəran”3 dəfə rəqibini 3 və ya daha çox top fərqilə məğlub edib və cəmi 1 dəfə belə ağır yenilgi alıb. Bu da son qarşılaşmaya təsadüf edib.

Son 3 qarşılaşmada uduzan “Xəzər Lənkəran” 15-ci dəfə “Qarabağ”la səfərdə görüşəcək. Rəqib meydanındakı 14 oyunda 3 qələbəsi olan Xəzər Lənkəran” 1 heç-heçə edib və 10 dəfə uduzub. “Qarabağ” öz meydanında top fərqində öndədir - 18:13.