“Neftçi”nin hədəfi qarşıdakı 4 oyunun 4-də də qalib gəlməkdir”

“Hava şəraiti bizə bir qədər maneçilik törədirdi. Buna baxmayaraq, yaxşı oyun sərgilədik, layiqli qələbə qazandıq. Komandamızı, azarkeşlərimizi təbrik edirəm”.

Futbolxeber.az saytına müsahibəsində bu sözləri “Neftçi”nin yarımmüdafiəçisi Murad Məmmədov Azərbaycan Premyer Liqasının 26-cı turunda “Sumqayıt”ı 3:1 hesabı ilə məğlub etdikləri oyun barədə danışarkən deyib.

O, ikinci hissənin əvvəlində buraxılan qolun komandanı ayıltdığını bildirib: “Düzdür, ikinci hissə başlayanda konsentrasiyamızı itirdik. Lakin qoldan sonra özümüzə gəldik. Necə deyərlər, “Neftçi” olduğumuzu bir daha meydanda göstərdik”.

21 yaşlı futbolçu “Neftçi”nin avrokubok şansını belə dəyərləndirib: “Hər oyunda qalib gəldikcə, motivasiyamız daha da artır. Düşünürəm ki, belə davam etsək, avrokuboklara vəsiqə qazanacağıq”.

M.Məmmədov “Neftçi”nin qarşıdakı gərgin qrafikində də söz açıb: “Hər oyuna hazırıq. Məqsədimiz hər matçda 100 faiz gücümüzü ortaya qoyub qələbə qazanmaqdır. İnanıram ki, bir az da artırsaq, daha yaxşı olar”.

“Qarşıdakı “Araz-Naxçıvan”, “Zirə” və “Qarabağ”la iki oyunda “Neftçi” neçə xal toplaya bilər?” sualını o, belə cavablandırıb: “Hədəfimiz 4 oyunun 4-də də qalib gəlməkdir. Bunun üçün əlimizdən gələni edəcəyik, vuruşacağıq. Meydanda əlimizdən gələni edəcəyik ki, bizi sevənlər məyus olmasınlar”.