“Berdıyev kimi təcrübəli baş məşqçinin bu iradı tam yerindədir”

“Turan Tovuz”un müdafiəçisi Faiq Hacıyevin Futbolxeber.az saytına müsahibəsi

- Azərbaycan Premyer Liqasının 24-cü turunda “Kəpəz”lə bərabərə qaldınız. 1:1-lik heç-heçəni necə şərh edərdiniz?

- Həftə boyu oyuna yaxşı hazırlaşmışdıq. Görüşün çətin keçəcəyini bilirdik. Qərb derbisi həmişə maraqlı olur. Qələbə qazanmaq istəyirdik. Lakin meydandan 1 xalla ayrıldıq. Bu nəticə bizim üçün yaxşı sayıla bilməz. Artıq növbəti matçları düşünməli, bu xal itkisindən nəticə çıxarmalıyıq.

- Sizcə, bu matçda “Turan Tovuz” 1 xal qazandı, yoxsa 2 xal itirdi?

- İndiki məqamda hər xal bizim üçün önəmlidir. Çünki qazanılan xallar bizi rəqiblərdən uzaqlaşdırır. Məncə, 1 xal qazandıq. Həm də 2 xal itirdik deməyim “Kəpəz”ə hörmətsizlik olar. Bundan sonra qazanılan hər xal xeyirdir.

- Bir gün əvvəl “Zirə” uduzmuşdu. Belədə aradakı xal fərqini daha da artıra bilərdiniz...

- Qələbə qazansaydıq, daha yaxşı olardı. Lakin indiki məqamda heç-heçə ilə də xal fərqini bir qədər də artırdıq. Hazırda 6 xal fərq olsa da, bu, bizim arxayınlaşdırmamalıdır. Çünki 3 xallıq periodda bu, elə də böyük üstünlük deyil. Qarşıda hələ 9 tur var. Ona görə də arxayınlaşmaq olmaz. Hələ heç nə etməmişik.

- Uzun müddətdən sonra meydana çıxdınız. Öz çıxışınızı necə dəyərləndirirsiniz?

- Düzdür, çoxdandır oynamırdım. Mən də forma şansı qazanmaq istəyirəm. Sağ olsun baş məşqçi bu matçda şans verdi. İnşallah, növbəti oyunlarda daha yaxşı çıxış etməyə çalışacağam.

- Matçdan sonra baş məşqçiniz Kurban Berdıyev bildirdi ki, komanda özündən zəif rəqiblərlə oyunlara köklənməkdə problem yaşayır. Bu, nədən irəli gəlir?

- Turnir cədvəlində aşağı pillələrdə qərarlaşan komandalarla görüşlərdə həqiqətən də xal itirdik. “Kəpəz”dən qabaq “İmişli” ilə də bərabərə qalmışdıq. Təbii ki, baş məşqçimiz haqsız deyil. Berdıyev kimi təcrübəli baş məşqçinin bu iradı tam yerindədir.

- Bəlkə komanda turnir cədvəlində özündən aşağıda olan rəqiblərlə oyunlarla arxayın çıxır?

- Deməzdim komandada arxayınçılıq olur. Rəqiblər bizə qarşı daha çox motivasiya olurlar. Bu məqam da işimizi bir qədər çətinləşdirir. Bu oyunlar bizə dərs olacaq. İnşallah, gələn matçlarda daha da motivasiyalı olacağıq.