“Kim deyir ki, “Araz-Naxçıvan” avrokubok iddiasından əl çəkib?”

“Araz-Naxçıvan”ın qapıçısı Kristian Avramın Futbolxeber.az saytına müsahibəsi

- Azərbaycan Premyer Liqasının 20-ci turunda “Sumqayıt”a 1:0 hesabı ilə qalib gəldiniz. Qələbəni necə şərh edərdiniz?

- Yaxşı qarşılaşma alındı. Oyunumuzu bəyəndim və matçdan zövq aldım. Rəqib güclü olsa da, komandamız qalib gəldi. Çox vacib 3 xal qazandıq. Bizim üçün bu görüşdə qələbə qazanmaq çox vacib idi. İstəyimizə çatdıq və buna görə də komandamızı təbrik edirəm.

- Son uğursuzluqlardan sonra komandada psixoloji cəhətdən problem var idi?

- Xeyr, heç bir problem yox idi. Bizim komandamız güclüdür, həmçinin psixoloji baxımdan da. Odur ki, hər hansı problem yaşamırıq. Rəhbərliyin futbolçulara inamı var və bu, çox vacibdir.

- Bu qələbədən sonra “Araz-Naxçıvan”ın “qara zolaq”dan çıxacağını düşünmək olar?

- Biz də bunun üçün çalışırıq. Məşqlərdə tam gücümüzlə işləyirik. Ümid edirəm ki, bu qələbə bizə əlavə impuls verəcək. Özünəinam artacaq və bizdən tələb olunanı daha yaxşı yerinə yetirəcəyik.

- “Sumqayıt” üzərində qələbədən sonra demək olar ki, “Araz-Naxçıvan” yenidən avrokuboklar uğrunda mübarizəyə qoşuldu?

- Məgər “Araz-Naxçıvan” mübarizədən çəkilmişdi? Kim deyir ki, biz avrokubok iddiamızdan əl çəkmişik? Biz oynayırıq, qələbə qazanmağa çalışırıq. Çempionatın sonuna hələ çox var. Mövsümün yekununda necə olacağını görəcəyik.

- Növbəti turda səfərdə “Karvan-Yevlax”la üz-üzə gələcəksiniz. Həmin matçdan gözləntiləriniz nədir?

- Çətin oyun olacaq. Rəqib sonuncu pillədə qərarlaşsa da, son zamanlar pis təsir bağışlamır. Onların da xala ehtiyacları var. Odur ki, bizi gərgin qarşılaşma gözləyir. İstənilən məqsədimiz “Karvan-Yevlax”a da qalib gəlməkdir.  

İbrahim Cəfərov