Qurbanov məğlubiyyəti şərh etdi

“Son üç oyunumuzu müqayisə etsək, bəlkə də ən pisi bugünkü idi”.

Futbolxeber.az saytının məlumatına görə, bu sözləri “Neftçi”nin məşqçisi Sənan Qurbanov Azərbaycan Premyer Liqasının 14-cü turunda “Sabah”a 0:2 hesabı ilə məğlub olduqları matçı şərh edərkən deyib.

Mütəxəssis geridə qalan 3 oyunda akademiya məşqçiləri ilə birlikdə əllərindən gələni etdiklərini, lakin nəticələrin yaxşı olmadığını və azarkeşləri üzdüklərini etiraf edib.

Sənan Qurbanov bu qarşılaşmanın son üç oyunun ən pisi olduğunu vurğulayıb:

“Son üç oyunumuzu müqayisə etsək, bəlkə də ən pisi bugünkü görüş oldu. Birinci hissədə rəqibə müqavimət göstərməyə çalışdıq. Meydana iki hücumçu ilə çıxdıq ki, bəlkə təzyiq göstərə bilək. Fasilədən sonra bəzi futbolçular zədə səbəbindən əvəzlənmək istədilər və bunu da reallaşdırdıq. Oyuna təsir etməyə çalışdıq, amma bu, nəticəsini vermədi”.

Məğlubiyyət fonunda yalnız Alessio Kurçinin azarkeşlərə yaxınlaşıb üzrxahlıq etməsi məsələsinə toxunan S.Qurbanov, əslində bütün futbolçuların nəticələrə görə utandığını qeyd edib:

"Allah qoysa, qarşıdakı günlərdə yeni baş məşqçi gələr və komandanı toparlayar. Biz ancaq "Neftçi"nin yaxşı olmasını arzulayırıq".

Səhvlərə yol verən Kenan Piriç və Sessi Dalmeydanın israrla start heyətində yer alması barədə sualı isə Sənan Qurbanov belə cavablandırıb:

“Siz kənardan bəlkə daha yaxşı görürsünüz. Mən də "Neftçi"nin oyunlarını izləyirdim. Amma birdən-birə qlobal dəyişikliyə gedə bilməzdim. Futbolçular gərək məşqlərdə yaxşı tərəfdən özlərini göstərsinlər ki, meydana çıxa bilsinlər. Mən sadəcə gördüklərimi oynatdım. Çox da dəyişikliyə gedə bilmədim”.