“Neftçi” niyə uduzdu? - QEYD

Sonuncu dəfə Azərbaycan çempionatının hansısa oyununa azarkeşlərin bilet axtardığını xatırlamıram. Reallıq budur ki, Premyer Liqamızın əksər matçları boş tribunalar önündə oynanılır. Lakin budəfəki “Qarabağ” - “Neftçi” görüşü üçün satışa çıxan təxminən 5 minə yaxın bilet qısa müddətdə satılmışdı. Bilet tapa bilməyənlər isə hansısa klubda çalışan dostuna, yaxud jurnalist tanışına ağız açmalı olurdu.

Oyun öncəsi stadionun qarşısındakı izdiham da anşlaqdan xəbər verirdi. Çempionatın təşkilatçısı Peşəkar Futbol Liqası da sağ olsun, matça rəng qatmaq üçün üzərinə düşəni etmişdi. İstər komandaların meydana şəhid övladları ilə çıxması, istər 42-ci dəqiqədə səslənən “Xudayar təsnifi”... Bir sözlə, hər şey möhtəşəm idi. Matçın ən qürurverci anı isə 90 dəqiqə boyunca komandalarına möhtəşəm dəstək verən “Neftçi” və “Qarabağ” fanatlarının “Şəhidlər ölməz, Vətən bölünməz!” şüarını bir yerdə, bir ağızdan səsləndirməsi idi. Hər bir azərbaycanlının qürur duyduğu mənzərə idi...

Təəssüf ki, meydandakı mübarizə tribunalardakı qədər möhtəşəm deyildi. Düzdür, komandalar elə də passiv, sönük görünmürdülər. Sadəcə qarşılaşma ərzində real qol epizodları azarkeşin istədiyi qədər deyildi.

“Qarabağ”ın start heyəti göstərdi ki, Qurban Qurbanov əzəli rəqiblə matça ciddi yanaşır. Adətən avrokubok matçlarından sonra Qurbanov əksər aparıcı futbolçulara əsas heyətdə şans vermir. Bu dəfə isə 1-2 nəfər istisna olmaqla, “Qarabağ” demək olar ki, meydana ideal “11-lik”lə çıxmışdı. Bunun bir səbəbi rəqibin “Neftçi” olması idisə, digər səbəb də çempionatda yaranacaq fasilə idi.

Ümumilikdə Ağdam klubu matç boyu rəqibindən üstün görünsə də, qarşılaşmadakı hər iki qol “Neftçi”nin səhvindən sonra vuruldu. Əvvəlcə Freddi Varqas, heç bir ehtiyac olmadığı halda rəqibin cərimə meydançasında kobudluğa əl atdı. O ayrı məsələdir ki, buna bənzər epizodlarda “Turan Tovuz” və “Zirə” ilə matçlarda “Neftçi”nin lehinə penalti verilməmişdi. Daha sonra isə əvvəlcə İqor Ribeyro, ardınca Elvin Bədəlovun səhvi Kevin Duranın “Neftçi”nin qapısına yol tapması ilə nəticələndi. Bir hücum zamanı komandanın iki mərkəz müdafiəçisi də səhvə yol verirsə, qol qaçılmazdır.

İqordan söz düşmüşkən, haşiyə çıxaraq deyim ki, braziliyalı müdafiəçi yeni klubunda “Araz-Naxçıvan”dakı ideal formasından uzaqdır. Görünür, “Neftçi”dən aldığı pullar braziliyalının başını dolandırıb. Hər oyuna özü üçün xüsusi fotoqraf dəvət etməsi öz işidir, amma yaxşı olar ki, fotolardakı kimi, meydanda da yaxşı görünməyə çalışsın. Yoxsa ki, oyundan əvvəl və sonra yerə diz çöküb dua etməklə iş bitmir. Futbol oynamaq lazımdır, İqor, futbol.

Uzun sözün qısası, “Neftçi” Azərbaycan derbisində ümidləri doğrultmadı. Bəli, “ağ-qaralar” son illərdəki kimi əzəli rəqibi qarşısında aciz görünmürdü, lakin “Neftçi” yaxşı oynadı” demək də düz deyil. 90 dəqiqə ərzində 2-3 təhlükəli hücum, yaxud rəqib qapıçını matç zamanı cəmi bir dəfə real şəkildə narahat etmək gözəl oyun deyil, dostlar...

O ki qaldı Samir Abbasovun matçdan sonra ən çox müzakirə olunan “Bu qədər adamın oyuna gəlməsinin səbəbi "Qarabağ" yox, “Neftçi”dir” fikrinə, 47 yaşlı mütəxəssis tam haqlıdır. Dünən Ağdam klubunun rəqibi “Neftçi” yox, Premyer Liqadakı digər 10 klubun istəniləni olsaydı, “Azərsun Arena” heç yarıyacan dolmazdı. Bunun “Çelsi” ilə oyundakı nəticə ilə heç bir əlaqəsi yoxdur. Elə olsaydı, “Benfika”, yaxud “Kopenhagen”lə görüşdən sonra “Azərsun Arena” dolardı.

İBRAHİM