İmad Faraj: “Penalti bizi “öldürdü”

“Neftçi”nin yarımmüdafiəçisi İmad Farajın Futbolxeber.az saytına müsahibəsi

- Azərbaycan Premyer Liqasının XI turunda “Qarabağ”dan alınan 0:2 hesablı məğlubiyyəti necə şərh edərdiniz?

- Çətin oyun alındı. Ümumilikdə pis çıxış etmədik. “Qarabağ” da yaxşı rəqibdir. Heyətlərində yüksək səviyyəli futbolçular var. Onlara qarşı əlimizdən gələni etdik. Bununla belə, təəssüf ki, xal qazanmaq mümkün olmadı. Sadəcə penalti bizi “öldürdü”.

- Çempiondan xal almaq üçün “Neftçi”də nə çatışmadı?

- Dediyim kimi, penalti biz mənfi təsir göstərdi. Bundan sonra cavab qolu vurmaq üçün çalışsaq da, alınmadı. Lakin ümumilikdə pis oynadığımızı düşünmürəm. İlk hissədə “Qarabağ”dan geri qalmırdıq.

- Bu məğlubiyyət “Neftçi”yə psixoloji cəhətdən mənfi təsir göstərməyəcək?

- Xeyr. Biz nə etməli olduğumuzu bilirik. “Qarabağ” güclü rəqibdir. Bunu unutmaq olmaz. Biz də çalışacağıq ki, növbəti oyunlarda qələbə qazanaq və bu məğlubiyyəti unutduraq.

- “Qarabağ”la görüşün hakimliyini necə dəyərəndirirsiniz?

- Məncə, penalti qərarı ağır idi. Qəribəsi odur ki, hakim heç VAR-a da getmədi. Elə dərhal, iki dəqiqənin içində qərar verildi. Halbuki adətən penalti epizodları VAR-da incələnir.

- İlk dövrə başa çatdı. 11 oyuna 15 xal “Neftçi” üçün az deyil?

- Təbii ki, bu nəticədən razı deyilik. İlk turlar yaxşı təsir bağışlamadıq. Mövsümə uğursuz start versək də, son turlar yaxşı çıxış edirik. Buna qədər cəmi 1 matçda uduzmuşduq. İnanıram ki, qarşıdakı turlarda yenə qələbələri sıralayacağıq.

İbrahim Cəfərov