"Sumqayıt" 4 yoxlama oyunu keçirəcək

"Sumqayıt" Futbol Klubunun əvəzedici komandası da hazırlıqlara start verib. Futbolxeber.az-ın klubun rəsmi saytına istinadən verdiyi məlumata görə, komanda hələlik gündə bir dəfə olmaqla məşqlərini davam etdirir. Hazırlıq planı ilə əlaqədar baş məşqçi Vaqif Paşayev klubun rəsmi saytına açıqlama verib: "Yanvarın 6-da komanda üzvləri və məşqçi heyəti arasında görüş keçirildi. Yanvarın 7-dən etibarən isə məşqlərə start verdik. Gündə bir dəfə olmaqla məşqlərimizi davam etdiririk. Bu toplanış daha çox seleksiya xarakteri daşıyır. Heyəti gücləndirmək üçün 10-a yaxın futbolçunu sınaqdan keçiririk. Bu proses çempionatın startına qədər davam edəcək. Qeyd edim ki, 5 futbolçu artıq sıralarımızı tərk edib. Çempionatın 3-cü dövrəsi başlayana qədər 4 yoxlama oyunu keçirməyi planlaşdırırıq. İlk olaraq yanvarın 14-də "Şəfa" stadionunda "İnter"in əvəzediciləri ilə görüşəcəyik. Ayın 18-də isə AZAL-ın əvəzediciləri ilə üz-üzə gələcəyik. Növbəti 2 oyunun tarixi isə hələki məlum deyil".