Həmyerlimiz Rusiya millisinin heyətində dubl etdi

FIFA-nın I vitse-prezidenti Valentin Qranatkinin xatirəsinə həsr olunmuş XXVI ənənəvi beynəlxalq turnirin qrup mərhələsində Rusiya millisi üçüncü oyununu da qələbə ilə başa vurub. Futbolxeber.az-ın məlumatına görə, Rusiya millisi qrupdakı son oyununda Sloveniyanı 6:0 hesabı ilə darmadağın edib. Rusiya U-19-unun şərəfini qoruyan həmyerlimiz Ramil Şeydayev turnirdəki üçüncü oyununda da meydanı qolsuz tərk etməyib. 56 dəqiqə meydanda olan Şeydayev 18 və 37-ci dəqiqələrdə fərqlənib. Bununla da o, turnirdə vurduğu qolların sayını 4-ə çatdırıb.

İlk turda Moldova ilə oyunda ikinci hissədə meydana daxil olan Şeydayev 74-cü dəqiqədə fərqlənmişdi. İkinci turda Estoniya ilə matçda isə 62-ci dəqiqədə meydana daxil olan həmyerlimiz 87-ci dəqiqədə rəqib qapısına yol tapmışdı. Beləliklə, qrup mərhələsində 129 dəqiqə meydanda olan Şeydayev 4 dəfə (orta hesabla hər 32 dəqiqədən bir) fərqlənib.

Rusiya U-19-unun şərəfini qoruyan digər həmyerlimiz - komandanın kapitan sarığısını daşıyan Ayaz Quliyev isə qrup mərhələsində 2 oyunda forma geyib və 1 qol vurub.