Samir Abasov: “Neftçi”də ab-hava mükəmməldir”

“Çox yaxşı toplanış keçdik. Bizim üçün çox səmərəli oldu. Düzdür, hazırlıq müddətində 4 yoxlama oyunu keçirməyi planlaşdırmışdıq. Lakin nəzərdə tutulan üçüncü matç yağış səbəbindən baş tutmadı. Bu da anlaşılan idi. O cür leysanda meydana çıxmaq mümkünsüz idi”.

Futbolxeber.az saytının məlumatına görə, bu sözləri “Neftçi”nin baş məşqçisi Samir Abasov yekunlaşan Polşa toplanışı barədə danışarkən deyib.

Mütəxəssis “Neftçi TV”yə müsahibəsində hazırlıq prosesi çərçivəsində Kiprin AEL klubuna qarşı keçirilən yoxlama görüşündən (1:1) də söz açıb: “Həm oyundan, həm də futbolçuların hərəkətlərindən razı qaldım. Çox maraqlı görüş keçdi. Bu matç mənim üçün əvvəlki oyunlardan fərqlənirdi. Meydanda dominat komanda var idi. Futbolçular top saxlamağa, nələrsə düşünməyə çalışırdılar. Rəqib də möhkəm, sərt komanda idi”.

O, komanda daxilidə atmosferin əla olduğunu vurğulayıb: “Tək oyunu yox, meydandan kənardakı amillərə də fikir veririk. Keçən il bu baxımdan müəyyən problemlər yaşadıq. Ona görə oyunla yanaşı, ab-havanı da düzəltməyə çalışırdıq. Deyə bilərəm ki, bunu bacarmışıq. “Neftçi”də ab-hava mükəmməldir. Bir məşqçi necə atmosfer arzulayırsa, vəziyyət eynən elədir. Bunu yeni transferlərdən də soruşsanız, onlar da eyni şeyi deyəcək. Məhz bu səbəbdən də yeni gələnlər adaptasiyanı çox yaxşı keçirlər. Komandadakı durumdan tam razıyam”.

S.Abbasov son transferlər - Kristian Kostin, Kenan Piriç və Alessio Kurçidən də söz açıb: “Ümumilikdə, yeni transferlərin hamısından razıyıq. Ümid edirəm ki, çempionatda bu uşaqlardan istədiyimizi alacağıq. Keyfiyyətlərinə, bacarıqlarına, bizə kömək edəcəklərinə inandığımız üçün onları heyətə qatmışıq. Özlərini çempionat oyunlarında yaxşı tərəfdən göstərə göstərə biləcəklər. Alessio Kurçi bu yay əvvəlki klubunda toplanış keçib, bu səbəbdən də onu AEL-lə matçda demək olar ki, 90 dəqiqə oynatdıq. Digərləri bir qədər fiziki baxımdan zəifdirlər. Kenan Piriç ayyarım fərdi məşq edib. Buna görə də onu AEL-lə matçda oynatmaq bir az riskli idi. Zədə almaq qorxusunu nəzərə alaraq, bu oyunda meydana buraxmadıq”.