Elmar Baxşıyevin möhürü

24 fevral 2024-cü il. Elmar Baxşıyev “Qəbələ”nin baş məşqçisi vəzifəsindən istefa verir. Həmin vaxt “qırmızı-qaralar” Premyer Liqanı tərk etmək təhlükəsi ilə üz-üzə idi. Mövsümün yekununda “Qəbələ” I Liqaya yuvarlandı. Bəziləri bu uğursuzluğun günahkarı kimi Elmar Baxşıyevı göstərdilər. Mütəxəssisin bir neçə ay əvvəl “Qəbələ”yə ölkə kubokunu qazandırması da unudulmuşdu...

8 aprel 2024-cü il. Elmar Baxşıyev “Araz-Naxçıvan”ın baş məşqçisi təyin olunur. Komanda 1 həftə sonra debüt oyununda “Neftçi”yə 0:3 hesabı ilə uduzur. “Araz-Naxçıvan”ın əvvəlki dövrələrdə 2 dəfə “Neftçi”yə qalib gəlməsini əldə bayraq edənlər bu təyinata “uğursuz” damğası vurur və Baxşıyevin Naxçıvan klubundakı fəaliyyətinin cəmi 2 ay çəkəcəyini iddia edirlər. Lakin mövsüm başa çatdıqdan sonra klub rəhbərliyi Baxşıyevə güvənir və ona istədiyi heyəti formalaşdırmaq şəraiti yaradılır.

19 may 2025-ci il. Azərbaycan Premyer Liqasının 35-ci turunda səfərdə “Şamaxı”nı 1:0 hesabı ilə məğlub edən “Araz-Naxçıvan” bürünc medalı təmin edir. Bununla da Naxçıvan klubu tarixində ilk dəfə Azərbaycan çempionatının mükafatçıları sırasına düşür. Bu, Elmar Baxşıyevin özünü təsdiqi idi. 45 yaşlı mütəxəssis sübut etdi ki, əlində material olanda qarşıya qoyulan hədəfə çata bilir.

24 iyul 2025-ci il. “Araz-Naxçıvan” avrokuboklarda debütunu qələbə ilə qeyd edir. Elmar Baxşıyevin rəhbərliyi altında komanda özündən qat-qat güclü “Aris” üzərində möhtəşəm oyunla əzmkar qələbə qazanır.

31 iyul 2025-ci il. “Araz-Naxçıvan” səfərdə “Aris”lə üz-üzə gəlir. İlk oyundakı minimal hesablı qələbəyə baxmayaraq, Saloniki klubunun heyətini, təcrübəsini, azarkeş amilini nəzərə alan mütəxəssislər mərhələ adlayan tərəfin məhz “Aris” olacağını proqnozlaşdırırlar. Lakin Elmar Baxşıyevin komandası bütün proqnozları alt-üst edir. “Araz-Naxçıvan” sərgilədiyi möhtəşəm oyunla, əzmkarlıqla mərhələ adlayaraq tarix yazır. Elmar Baxşıyevin rəhbərliyi altında Naxçıvan klubu sübut edir ki, həyatda olduğu kimi, futbolda da pul çox şeyi həll etsə də, hər şey demək deyil. Büdcəsi heç 10 milyona çatmayan “Araz-Naxçıvan” 50 milyonluq büdcəsi olan “Aris”i mübarizədən kənarlaşdırır. Təbii ki, futbol kollektiv oyundur. Qazanılan uğurda komandadakı hər kəsin rolu var. Amma bu, ilk növbədə Elmar Baxşıyevin uğurudur. Bu, 45 yaşlı mütəxəssisin möhürüdür. Bir vaxtlar "Qəbələ"dən göndərilən, "Araz-Naxçıvan"a gələrkən “2 aylıq” adı verilən mütəxəssis bu gün Avropada tarix yazır!

Növbəti mərhələdə “Omoniya” ilə oyunlarda hansı nəticənin qeydə alınmasından asılı olmayaraq, “Araz-Naxçıvan” artıq boyundan yuxarı tullanıb. Ölkə daxilində daha yüksək büdcəli rəqiblərini qabaqlayan Elmar Baxşıyevin komandası bu ənənəni Avropada da davam etdirdi. “Barselona” və “Real”ın yetirmələrinin, vaxtı ilə “İnter”də, “Portu”da oynamış futbolçuların cəmləşdiyi “Aris”in mübarizədən kənarlaşdırılması böyük uğurdur. Və uğurda Elmar Baxşıyev imzası var.

“Araz-Naxçıvan”ın hazırda nə stadionu var, nə məşq üçün meydançası. Komandanın heç avtobusu da yoxdur. Digər klublar səfərə çarter reysi ilə yollanarkən Naxçıvan təmsilçisi “Aris”lə oyuna Bakı-Afina-Saloniki reysi ilə yollandı. Lakin bütün bunlar komandanın oyununa təsir göstərə bilmədi. Deməli, istək və iş olan yerdə uğur qazanmaq mümkündür...

İbrahim Cəfərov