Rövlan Muradov: “Zərbəni vuranda ani qərar qəbul etdim, bunu məşqlərdə də edirəm”

“Bilirdik hansı rəqibə qarşı oynayırıq. “Hayduk” Xorvatiyanın ən köklü klublarından biridir. Rəqibi yaxşı analiz etmişdik, boşluqlarını bilirdik. Əfsuslar olsun ki, sadə bir vəziyyətdə qapımızda qol gördük. Sonra nə qədər çalışsaq da, ikinci qolu vurmaq mümkün olmadı”.

Futbolxeber.az saytının məlumatına görə, bu sözləri “Zirə”nin yarımmüdafiəçisi Rövlan Muradov UEFA Konfrans Liqasının ikinci təsnifat mərhələsinin ilk oyunu çərçivəsində Xorvatiya “Hayduk”una qarşı keçirilən matç (1:1) barədə danışarkən deyib.

O, Bakıdakı heç-heçədən sonra mərhələ adlamaq şanslarının bərabər olduğunu bildirib: “Cavab oyununa qələbə üçün çıxacaq. Əlimizdən gələni edəcəyik ki, qalib gələk. “Hayduk” nə qədər güclü olsa da, səfər görüşündə layiqli mübarizə aparmaq üçün çalışacağıq”.

Matçın sonlarında Muradovun zərbəsi qapı dirəyinə tuş gəldi. 27 yaşlı futbolçu həmin epizodu belə dəyərləndirib: “Zərbəni vuranda ani qərar qəbul etdim. Bunu məşqlərdə də edirəm. Qapını gördüm və zərbə endirdim. Təəssüf ki, bəxt bizdən üz döndərdi və top dirəyə tuş gəldi”.

“Zirə”nin heyətində ilk rəsmi matçına çıxan yarımmüdafiəçi bildirib ki, komandaya asanlıqla uyğunlaşır: “Kollektivdəki futbolçuların bəziləri ilə daha əvvəl biryerdə oynamışam. Rəşad Sadıqovu da çoxdan tanıyıram. 2018-ci ildə məni o, “Qarabağ”a dəvət etmişdi. Çox istəyirəm ki, daha tez adaptasiya olum və hər bir matçda komandama bacardığım qədər, hətta bacardığımdan da daha çox kömək edim”.  

İbrahim Cəfərov