Rüfət Abdullazadə Xorvatiya klubunda

“Səbail”in futbolçusu Rüfət Abdullazadə karyerasını ölkə xaricində davam etdirəcək.

Futbolxeber.az saytının məlumatına görə, 24 yaşlı yarımmüdafiəçi Xorvatiyanın “Varazdin” klubu ilə müqavilə bağlayır. Bir neçə gündür Xorvatiyada olan Abdullazadənin keçidinin tezliklə rəsmən açıqlanacağı gözlənilir.

Son günlər Rüfətin adı müxtəlif klublarla yanaşı çəkilirdi. Azərbaycan Premyer Liqasının 2 təmsilçisi onu heyətində görmək istəyirdi. Həmçinin ölkə xaricindən də təklif var idi. Lakin “Səbail” rəhbərliyi alqışlanası addım ataraq daha çox pul qazanmağı yox, futbolçunun gələcəyini seçdi. Belə ki, istər yerli klublar, istərsə də ölkə xaricindən təklif göndərən aşağı liqa təmsilçiləri futbolçu üçün daha yüksək təzminat məbləği ödəməyə razı olublar. Buna baxmayaraq, “Səbail” Xorvatiya klubunun yüksək liqada oynamasını, Abdullazadə üçün bu variantın daha perspektivli olmasını nəzərə alaraq, futbolçusunu daha aşağı məbləğdə satmağa razı olub.

Xatırladaq ki, peşəkar karyerasına 8 il əvvəl “Sumqayıt”da başlayan Rüfət Abdullazadə 2023-cü ildən “Səbail”də çıxış edirdi.

Əlavə edək ki, Rüfətin yeni klubu “Varazdin” 2012-ci ildə yaradılıb. Ötən mövsüm ən yüksək nəticəsinə imza ataraq Xorvatiya çempionatında 4-cü olan kollektiv tarixində ilk dəfə avrokubokarda oynamaq şansı qazanıb. 2 gün sonra “Varazdin” Konfrans Liqasının ikinci təsnifat mərhələsinin ilk oyunu çərçivəsində Portuqaliyanın “Santa Klara” klubu ilə üz-üzə gələcək. Komanda yeni mövsüm ölkə çempionatındakı ilk matçını isə avqustun 1-də öz meydanında “Qoritsa”ya qarşı keçirəcək.