Berezutski kuboku qazanmasa, xələfi bu azərbaycanlı məşqçi olacaq - EKSKLÜZİV

“Sabah”da mövsümün sonunda baş məşqçi dəyişikliyi baş verə bilər.

Futbolxeber.az saytının əldə etdiyi məlumata görə, ölkə kubokunun finalı hazırkı baş məşqçi Vasili Berezutski üçün son şansdır. Əgər “Sabah” kubokun finalında qələbə qazanmasa, rusiyalı mütəxəssis postundan göndəriləcək.

Berezustkinin gedişi reallaşarsa, onu baş məşqçi vəzifəsində yerli mütəxəssis əvəzləyəcək. Bir müddətdir əcnəbi məşqçilərlə istədiyi nəticələrə nail ola bilməyən “Sabah” rəhbərliyi bu dəfə komandanı azərbaycanlıya tapşırmağı planlaşdırır.

Həmin mütəxəssis də məlumdur. Söhbət “Şamaxı”nın və U-21-in baş məşqçisi Ayxan Abbasovdan gedir.

Bu xəbərin doğruluğuna işarə edən vacib məqam var. Belə ki, Ayxan Abbasovla “Sabah”ın prezidenti Maqsud Adıgözəlovun münasibətləri çox yaxşıdır. Abbasovun U-21-in baş məşqçi vəzifəsinə namizədliyini AFFA İcraiyyə Komitəsində də məhz Adıgözəlov irəli sürüb.