“Sabah”ın yalanı: Sekidika özü “Neftçi”yə keçmək istəyib

Dünən bəyanat yayaraq “Neftçi” və sabiq futbolçusu Elvin Camalova qarşı ittiham irəli sürən “Sabah”ın tələbi reallığa əks etdirmir.

Futbolxeber.az saytının məlumatına görə, “Sabah”ın adını məxfi saxladığı futbolçu Cesse Sekidikadır. Lakin reallıqda nigeriyalı forvard özü “Neftçi”yə keçmək arzusunda olub. Belə ki, Sekidika sabiq komanda yoldaşı Elvin Camalovla “Neftçi”yə xəbər göndərib. “Ağ-qaralar” isə bu məsələni yalnız mövsümün sonunda müzakirə edəcəyini bildirib.

“Sabah”ın digər bir yalanı müqavilənin müddəti ilə bağlıdır. Nigeriyalı futbolçunun klubla müqaviləsi “2+1 il” müddətinədir. Sözləşmədə müddəti uzatmaq baxımından üstünlük “Sabah”ın yox, Sekidikanın tərəfindədir. Yəni futbolçu istəməsə müqavilədəki “+1” bəndi işə düşməyəcək.

Qəribədir ki, Cesse Sekidikanın Camalov vasitəsi ilə “Neftçi”yə keçmək barədə xəbər göndərməsi indinin yox, 2 ay əvvəlin söhbətidir. Bu halda “Sabah” niyə indi bu məsələni ictimailəşdirib?

Burada iki ehtimal ola bilər. Ya nigeriyalı futbolçu yeni müqavilədə qazancını artırmaq üçün “Sabah”a “Neftçi”dən təklif aldığını bildirib, ya da “Sabah” tərəfi qəsdən indidən bu söhbəti qaldıraraq kubokun cavab görüşü öncəsi “Neftçi”yə təzyiq göstərmək istəyir.

Futbolxeber.az